Away todo-todo sa Pasko

Uy, Balodoy, nia ka ra diay dinhi sa videokehan nga impiyerno sa kwarta ug nagtibol pa gyud ka og “chicks” nga hapit na lang maghubo sa iyang bisti!”, langgis kaayong tingog ni Basyang ning halawom nang takna sa kagabhion sa vidokehan ni Doray Ilongga sa lungsod sa Sta. Filomena.

Midugang si Basyang sa lanog niyang tingog. “Asa na man ang imong bonus?”

Wala pa makatingog si Balodoy gipangrekisa ug gipanghiram ni Basyang ang iyang mga bulsa sa karsones, bulsa sa polo lakip na sa medyas.

“Mao na lang ning bayente pesos ang nihibilin sa imong bonus nga balig diyes mil pesos?” sukna nga dala’g pangusmo sa hilabihang kasuko ang tingog ni Basyang.

“Misis, ganina ra na siyang udto dinhi uban sa iyang nga barkada. Nagbaha ang beer ug mga sumsoman lakip ang mga waitress gani magpuli-puli lang dinha sa iyang tibol,” sulti nga agi’g tubag niadtong edad-edaran nang kustomer nga nagsabak og waitress.

Usa ka drayber si Balodoy ni Mr. Lam Hong nga negosyante og kopras ug mga “hollow blocks” sa ilang dapit.

Taud-taud na siya sa iyang trabaho mao nga gihatagan siya’g sweldo sa iyang among Intsik nga diyes mil matag bulan.

Kumo kay Pasko man, diyes mil usab ang nadawat niyang bonus.

“Mao kini angay nimo, ummm!!!”, gilaparo ni Basyang si Balodoy.

“Agay! Kasakit sa akong ulo, gilaparo ko nimo sa imong payong,” agulo ni Balodoy.

Dili pa gyud ni mao, gilangkatan pa gyud sa iyang polo si Balodoy ug naghukas na lang siya.

Gialirongan sila sa mga tawo, morag piyesta nga daghan kaayo ang nagpunsisok.

“Hunonga na’ng inyong panag-away ug uban kamo sa presinto,” pagyahat ni Basyang ug ni Balodoy nakita nila ang duha ka polis.

“Mouban kami Tsip,” nagkadungan og tangdo sila si Basyang ug Balodoy.

Miiway sa agianan ang mga tawo  nga pulos usosiro. Busa, kinahanglan nga unahon gyud nato ang pamilya usa pa ang hapihapi sa mga barkada. (Kataposan)