Pasko sa kasakit ni onyot

Senyang, wala gyod tay asenso ini kun magpadayon ta sa kahimtang niining atong pagpuyo karong panahona, pamahayag ni Onyot ngadto sa iyang asawa samtang nanihapon sila uban sa ilang bugtong anak nga si Botchok.

“Nganong nakasulti ka man og ingon ana?”, nangutana si Senyang. “Ay da, drayber lang ko ni Mrs. Santos sa lungsod  ug gamay ra ang sweldo ug usahay madelatar pa gyod”, tubag ni Onyot. Mipadayon siya, “paspas kaayo moligid ang panahon ug dili lang unya nato mahibaw-an nga modako na si Botchok”.

Taud-taod nang drayber si Onyot ug wala pay kaugalingong payag silang gipuy-an kay gipapuyo man lang sila ni Mrs. Santos isip usa sa iyang mga ginsakopan.

“Unya, unsa na man lay kan-on nato Onyot,l unsa may plano nimo?”, sukna ni Senyang. “Mo-abroad ko isip drayber ngadto sa nasud sa Kuwait. Two-years contract ra og makauyon ko i-renew lang unya nako”, tubag ni Onyot.

Pila ray estorya, nakagikan gyod si Onyot gumikan sa kwarta nga tinantohan niya gikan sa iyang mga kahigalaan ug kaparyentehan.

Paspas ang dagan sa panahon wa lang damha mousa na ka tuig si Onyot sa Kuwait ug sulat ra gyod ang komunikasyon tali nila ni Senyang kay silang duha wala maningkamot nga makakat-on sa paggamit og selpon nga high-tech na man unta karong panahona.

Apan, nahibulong si Onyot nga panagsa ra man mobawos og sulat kaniya ang iyang asawa nga kompleto man unta si Senyang sa allotment matag bulan.

Duha na ka tuig ang milabay ug natapos na gyod ni Onyot ang iyang contract sa pagpanarbaho sa Kuwait.

Atol gyod nga pasko ang paghiuli ni Onyot sa ilang panimalay. Daghan siya’g dala ug mga regalo. Apan nahibulong siya sa iyang nakita nga usa ka busloton ug nagtakilid pa gyod nga panimalay. Misugod ang pagkulba sa iyang dughan daw dili siya makatoo sa iyang nasaksihan ug gikan sa layo iyang nalantawan ang anak niyang si Botchok nga nagkawos og tubig sa ilang silingan nga si Tonying.

Daot na si Botchok. Gagmay na’g mga bukton. Nipis ang dughan ug sa pagkakita sa iyaha dali kining midagan paingon niya nga naghilak.

Giasoyan siya sa tanan ni Botchok nga otso anyos na karon. Nahibaw-an nalang ni Onyot nga mikuyog diay og laing lalaki si Senyang u g gibilin si Botchok sa ilang silingan.

Dinhi daw nahugno ang kalibotan ni  Onyot. Imbis kalipay ang mosugat kaniya, kasakit na hinuon ang iyang natagamtaman atol sa pasko! (Kataposan)