Gipasaylo ni Enting ang iyang kaaway atol sa Pasko

Halawom na ang takna sa kagabhion, nahapugwat si Enting sa iyang pagkahinanok gumikan sa singgit-singgit sa ilang silingan nga hubog na sab nga si Doroy. “ Kinsay isog diha! reklamo mo!” Mao kanang mga pulonga nga miukiot sa iyang mga dunggan.

Mao gyod kana si Doroy kun mahuslok magsige’g singgit-singgit og panghagit sa iyang mga silingan. Unya magsige intawon og badlong ang iyang asawa nga si Binyang nga naghambin intawon sa iyang sakit nga nerbiyos.

“Husto na intawon Dorooy....!, tungang gabii na makadistorbo ta sa atong mga silingan nga namahulay na,” alam-alam ni Biyang ngadto sa iyang bana.

“Tay, patuo intawon ni nanay, oy huhuhu”, hilak pakilooy sa pinangga niyang anak nga si Dodong. Anhi ra mopatuo si Doroy inigka dungog niya sa tingog sa bugtong anak nila.

“Salbahis gyod na si Doroy da bisan og hatagan nato silag’ sud-an matag hikay nato ug pahulawom pa gyod nato’g kwarta nga walay tanto-tanto, magsige na hinuon og panghasi bisa’g mingaw na kaayo ang palibot. Maglagot gani ko ron tigbason gyod na nako siya,” nanganti si Enting. “Ayaw intawon na buhata kay mapriso ka ug maamong lang unya ka ana. Nag-angat ra ba ang pasko karong panahona!”, badlong pa ni Asyat nga maayong mo baraha sa ilang dapit. Mipatuo si Doroy. Usa ka construction worker si Doroy. Mao lagi na inigsweldo matag Sabado mahuslok gyod uban sa iyang mga barkada ug amigo. Pag-abot sa ‘noche buena’ nahibaw-an ni Enting nga gidala si Doroy ngadto sa tambalanan kay misuol ang sakit niya sa atay ug nahasiril-siril ang iyang asawa sa pagpanghulam og kwarta para ikapalit og tambal nga gireseta sa doctor sa ilang lungsod.

Buntag sa pasko, nagkuyog sila si Enting ug Asyat dala ang tambal ni Doroy sa ospital. “Pre, pasayloa ko sa akong pagtugaw sa inyong pagpahulay atol sa pagsinggit singgit nako kun mahubog ko. Naghago pa man mo Pre, daghang salamat niining mga tambal,” namulong si Doroy samtang gipatumar siya sa nars sa gireseta kaniya.” Walay kaso na Pre, adlaw ron sa pasko nga maoy adlaw sa pasayloay ug sa paghangpanay pahinungod sa atong Manunubos!, mubong tubag ni Enting. (Katapusan)