Pablo gialihan ni San Pedro ug Sto. Niño

Sa adlaw nga gibalita pa lang ni Leo Lastimosa nga adunay umaabot nga super typhoon Pablo, diin kusog pa sa bagyong Ruping ug Sendong, mikatap dayon sa mga selpon ang awhag sa pag-ampo gikan sa mga relihiyosong nagpakabana. Kining tagsulat, kinsa usa sa mga milyong debotos nilang San Pedro Calungsod ug Sr. Sto. Niño, nakadawat sab. Ug ang maong hangyo kinasingkasing kong gihimo.

Namatud-an na sa nangaging mga katuigan, nga kun aduna gani magsingabot nga katalagman, mag-ampo dayon ang katawhan ngadtong Sr. Sto. Niño nga unta iyang panalipdan ang Sugbo. Lahi ang mga debotos sa Milagrosong Bata, kun mao nay mangadye. Kasagaran, motulo gyud ang luha timaan sa kahugot sa ilang pagtuo... nga: “Pangayo lang, ug hatagan ka Niya.” Tuod man, atong namatikdan nga ang siyudad sa Sugbo, halos sa tanang higayon giiwas sa mga gumonhap kang kansang kabangis mokusokuso, moguba ug mopatay sa kinabuhi ug kapanginabuhian sa tawo.

Unya, niining bag-o, gihudlat na sab ta sa bagyong Pablo nga matud pa sa Pag-asa mas mangtas pa kay sa miaging mga bagyo nga kanhi nagbilin og masakit kaayong kasinatian sa atong dughan. Nahadlok kita nga mausab pa kadto. Ning panahon nga ang balor sa peso gamay na lang kaayo, unya ang suweldo nagpabiling gamay samtang ang presyo sa palaliton naglumba pagsaka sa itaas, maglisod na gyud tang mga pobre pagpabarog pag-usab sa payag nga sayonsayonon lang pagkuniskunis-guba ni Pablo.

Gumikan niini, ang tanang debotos ni Sr. Sto. Niño, nangaliya nga unta dili lang maigo ang atong dakbayan sa kapintas ni Pablo. Usab, gisangpit ang bag-ong santos, Pedro Calungsod, kinsa niining bag-o sunodsunod nga mipabati sa iyang mga milagro, nga unta iya tang tabangan nga dili mahiagom sa makamatay’ng latos sa gikahadlokang Pablo. Ug gidungog sa duroha ka santos ang mga pag-ampo ta. Gialihan sa ilang mga milagrosong kamot ang bagyo. Busa, milihay kini.