Madanglog nga kalibutan - Gula 2

Giingnan ni Martin ang girlfriend niya nga si Clarissa nga mangadto sila sa usa ka linaw nga nahimutang sa barangay Sapangdaku.

Gipangandaman g’yud ni Martin ang ilang deyt kay nanghuwam siya’g motor sa iyang amigo aron ilang magamit. “Duna ka diay driver’s license?” gisukna ni Clarissa si Martin sa wala pa sila mosakay sa motor.

“Wala koy lisensya apan walay manakop nato kay ari ko moagi sa karsada nga walay traffic enforcers. Sigi na, sakay na,” matud ni Martin dihang nakapahimutang na siya atubangan sa manobela.

Si Clarissa ang nagkabiba sa bag ni Martin nga gisudlan sa mga sinena. “Hinay-hinay lang pagpadagan Martin,” ingon sa nahadlok si Clarissa kay kusug kaayo nga mipadagan ang iyang boyfriend.

Wala danti’g oras, didto na sila sa Sapangdaku. “Ibilin nato ang motor diha sa balay, ato lang bayran sa pagbantay,” matud ni Martin. Lakwonon pa og mga tunga sa oras ang dapit nga nahimutangan sa linaw.

Nakabantay sila si Martin ug Clarissa nga gawas kanila, duna sa’y daghang mga tawo nga naglakaw ‘sab tungas sa bukid subay niadtong gamay’ng dalan-dalan. “Hala, kanindot diay kaligoan dinhi uy,” nakatuaw si Clarissa pagkakita niya sa linaw.

“Ang akong amigo maoy mitug-an nako nga nindot kaligoan dinhi mao nga gidala tika,” matud ni Martin.

Gikuha ni Martin ang iyang short pants sa bag. “Ikaw, naay mora’g CR sa unahan makahimo ka sa pag-ilis. Isul-ob nang short pants nako diha ug T-shirt,” ni Martin.

Gituman ni Clarissa ang giingon kaniya ni Martin. Nangaligo dayon sila sa linaw. Alegre kaayo sila kay duna man sa’y daghang nangaligo. Mikawas sila gikan sa tubig ug nangaon.

Nagdala og bawon si Martin kay nasayud siya nga walay naninda og pagkaon sa dapit nga ilang adtoan ni Clarissa. “Kun magminyo na kita Clar, pila ang gusto nimo nga atong anak,” gipangutana ni Martin ang iyang girlfriend.

“Ambot nimo uy, dili usa kita maghisgot ana kay mga bata pa ta,” matud ni Clarissa nga wala ganahi nga motubay sa maong topic. Wala na usab moinsistir pa si Martin.

Sanglit basa man ang T-shirt nga puti nga gisul-ob ni Clarissa, mihulma ang lawas sa dalaga apil ang duha ka nagbugdo sa iyang dughan. Nakapanglad-ok sa laway si Martin nga kaganina ra nga nagsigi’g pasiklap niini.

“Kanus-a kaha ko makagakus nimo Clar no? Maayo unta og karon na,” nagngisi si Martin. Igo lang mikulismaot ang panagway ni Clarissa. Mibalik sila pagpangaligo sa linaw.   (Sumpayan)