Lisod pagpangita’g katabang karon

Magtiayon nga suod ning tagsulat, Juvy-Rover Tanudtanod nga anaa puyo sa dakong bilding nga may 30 kapin ka pamilyang nag-abang sa may dalan V. Rama ning dakbayan, misugid nga naglagot kuno sila sa ilang silingan kay giinkitar ang ilang katabang, kinsa usa pa lang ka bulan nga nahayir nila gikan sa probinsiya. Gitanyagan kini sa wala’y kaikog nga silingan og suweldo nga mas dako pa kay sa ilang gihatag. Maayo gani, kay mitug-an nila ang helper. Ug dali ra kaayo nakakita’g paagi ang magtiayon unsay angay buhaton.

Gisumbong nila kini sa tag-iya sa bilding ug nagpaskin sila’g dakong karatola halos sa tanang dapit nga nagpahibalo: ‘Pirating helper from your neighbor’s hold is strictly prohibited.”

Nahimuot ko. Ang nasinati nilang Roger naagian sab nako ug sa akong misis diri sa among subdibisyon. Kaniadto may helper sab mi nga gi-pirate sa wala’y puangod namong silingan. Dili ra ba homeowner ang tonta. Giabang lang og balay sa Negro niyang kabit. Nindot ang offer. Bantay lang kuno sa bata ang trabaho sa helper. Unya, suweldohan siya’g dako. Aw, mibalhin gyud ang among helper didto sa ilaha. Naunsa ba, nga mitulo na man lang ka bulan ang pagsenerbisyo sa helper sa maong babaye, giutang man ang suweldo? Ang nakanindot ra ba kay bisa’g kinsa na lang lalakiha ang mosaka sa ilang balay ug makit-an sa helper nga makigdulog sa iyang agawon. Didto nahibaw-an sa helper nga prosti diay ang bruha ug taudtaod nang wala padad-ig dolyares sa kabit. Naimpluwensiya ra ba ang helper. Natakdan sa iyang amo. Nakat-on sab pagpanglipstik bisa’g tigulang na. Wala magdugay ang maong babaye sa among subdibisyon. Gipalayas sila sa tag-iya sa balay dihang wala nay ikabayad sa abangan.

Lain namong silingan, misulay sab pag-pirate sa latest namong helper. Maayo sab ang tanyag. Papuy-on kuno ang tibuok pamilya sa among minyo nang helper didto sa ilang panimalay ug bantay ra sa bata ang buhat. Dihang nangutana sa among helper kun pilay gisuweldo namo, mora’g natuk-an ang batan-ong donya. Gidak-an ra. Busa, mihangyo sa helper nga puwede ba pagamyan? Total, libre man unya silang tibuok pamilya inig balhin niini didto sa ilang balay?

Wala masayod ang mahilabtanong silingan nga kining helper nga nia namo karon, loyal kaayo namo. Tiaw bay, sa wala pa kami anak ni misis, siya na ang among katabang. Hangtod nga nangadagko na lang ang mga bata, siya gihapon ang miserbisyo namo. Gani, giisip man namo siya nga among igsuon. Mibuwag lang siya namo dihang naminyo na siya. Apan dihang iyang nabalitaan nga naglisod na kami pagpangita’g helper nga pareha niya kabuotan, naluoy siya. Mibalik siya sa pagpangalad namo. Pero, mao lagi...gusto siyang ilogon sa among silingan. Paita, wa gyud sila makakita’g para ilaha?

Dinhi nakaingon ko. Lisod na gyud tinuoray ang pagpangita’g katabang karon. Kay ultimong taga-bukid, abtik na. Kaantigo na mamili. Gusto sila nga ang ilang trabaho kanang gaan ug hayahay. Unya dako’g kita! Hinuon, dili tanan, ha? May nahabilin pa. Apan maihap na lang sa tudlo. Samot na, kun ang prostitusyon himuon nang legal sa atong gobiyerno.