Goodbye is not Forever
Gula 22
Unya nagkatinutokay sila. Apan wala madugay, milingiw si Albert. Ang labhag sa kasubo, kahadlok ug kabalaka mihulma sa iyang panagway. Ug kini malagmit nasihag ni Josheba samtang gitutokan siya niini.
“Albert, may kahiubos ka ba kanako?” Wala makapugong sa pagpangutana ang dalaga. Gisapwang niini ang nawong sa ulitawo ug gipaatubang kaniya.
“Wa man,” daling tubag sa ulitawo nga milikay pagtan-aw sa dalaga. “Nganong mahiubos man kuno ko nimo?”
“Apan nganong ingon ka man niana karon? Kaganina ra akong nakamatikod nga ingon sa wala kay kadasig nga makigsulti kanako?”
Wala motingog si Albert.
“Anything wrong, Albert?” ni Josheba.
“Nothing,” mubong tubag sa ulitawo.
“Apan nganong ingon sa subo man kaayo ang imong panagway?”
“Wa kini kaso. May nahinumdoman lang ko.”
“Unsay nahinumdoman mo?”
“K-kuan...na-nahinumdom lang ko sa gipanagsultihan namo ni Eking bahin natong duha.”
“Mahitungod ba sa atong kasal?”
“D-dili,” matud ni Albert, nunot ang hinay nga paglingo.
“Gikomedyahan ako ni Eking.”
“Nga unsa?” Gitutokan siya ni Josheba. -- Sumpayan pa
- Latest
