Motuo ka’g dili (Matag Domingo)

Matag higayon nga mag-date sila si Mildred mamatikdan ni Dante nga ingon sa maghilomhilom lang ang dalaga. Sa sulod sa usa ka sinehan nga ilang gitan-aw, wala’y tingogtingog ang dalaga. Bisan gani dihang gihagkan ni Dante ang mga ngabil sa dalaga igo lang kini nga nagpatara. Tungod niini, wala ganahi si Dante. Mihunong na lang siya sa pagromansa kang Mildred.

“Bugnawa nimo, uy,” ni Dante nga mihagawhaw.

“Oo, bugnaw kaayo ang aircon,” tubag ni Mildred.

“Dili na maoy akong ipasabot, Mil,” gipaduol ni Dante ang iyang baba sa dunggan sa dalaga. “Ikaw ba, dili man ka mobawos sa akong mga romansa ug karinyo.”

“Sorr, ha, Dan,” hinay’ng tingog sa dalaga. “Wala pa man gud batia og gana...”

“Okey, manggawas na lang ta dinhi sa sinehan nga atong gitan-aw,” hunghong ni Dante.

“Asa man ta?” hinay ug paraygon ang tingog ni Mildred.

“Mahibaw-an ra unya nimo,” mipahiyom si Dante.

Didto sila mopaingon sa usa ka motel. Dinhi ingon sa wala maghilomhilom si Mildred. “Nganong dinhi man ta paingon, Dan?”

“Of course, aron masayran nako kun tinuod mo ba akong gimahal, Mil,” ni Dante pa. Unya mihubo si Dante sa iyang sapot ug miduol kang Mildred.  Iyang gihagkan ang dalaga. Nakita ni Dante nga mipiyong kini, dayon mihigda, miagulo. Nahibulong si Dante sa pag-agulo nga wala pa niya buhata sa dalaga ang pag-angkon niini. Mitakilid kini ug kalit nga gigabling ang nawong ni Dante paduol kaniya.

Sa ilang paghalok nabatyagan ni Dante nga medyo mitidlom sa tutunlan ang dila ni Mildred. Kataas og dila ni Mildred niya pa sa hilom. Ug miutnga si Mildred ug dayon mitindog kini ug sa dakong kahikurat ni Dante iyang nakita ang dila ni Mildred nga hilabihan nang taasa.

“Mildred, Dios ko, pagka-taas na sa imong dila nga miabot na sa salog!” mitindog si Dante sa kahadlok.

“He, he, mahal ko ikaw, ug dinhi sa sulod sa motel balbalon tika ug kining akong dila akong ipatidlom sa imong tinai!”

“Ungo ka diay, Mildredddd!!!” Ug mikalit og dagan si Dante nga nag-brief ang paingon sa gawas sa motel nga nagpaninggit og pakitabang, apan gilutos siya ni Mildred ug mibalikos ang taas nga dila sa liog ni Dante ug hugot kaayo nga gituok ang ulitawo. (Kataposan)