Police Lover

Gula 5

Buhong kaayo sa romansa sila si Romeo ug Grace atul sa una nila nga deyt sa sinehan. Human sa ilang pagpanan-aw og sine nagsilbi kini nga sinugdanan sa ilang kasuod. Wala nay hunong ang ilang pagkontakay. Nahimong inspirasyon ni Romeo si Grace sa iyang trabaho.

Apan bisan og suod na kaayo sila si Romeo ug Grace, apan gidid-an si Romeo sa iyang girlfriend nga polis sa pag-adto sa police station kay nahadlok si Grace nga matsismis sa iyang mga kauban kay nasayod ra ba sila nga minyo na siya.

Usa ka hapon, nag-duty si Grace sa police station. Nakadawat siya’g text message gikan ni Romeo nga nangumosta kaniya. Nagpadayag si Romeo sa iyang gibati nga matud pa naghambin og dili matukib nga kamingaw kang Grace.

Mi-reply si Grace ug gitug-anan niya si Romeo nga ingon usab niini ang iyang gibati. Nagkasabot sila nga magkita inig-off ni Grace sa trabaho pagka alas singko sa hapon. Naghinam-hinam si Grace sa ilang panagkita kay ang tinuod gimingaw na usab siya kaayo ni Romeo.

Dili makatambal sa ilang kamingaw ang wala’y putol nila nga pagpadad-anay og mga text messages. Nag-ilis na si Grace. Gisud-ong ni Grace ang iyang kaugalingon diha sa salamin. Mipahiyom si Grace nga mitutok sa iyang panagway sa salamin.

Wala gayud magkomedya ang mga midayeg kang Grace. Igo lang sila nga mitug-an nga tinuoray siya nga maanyag. Apan mikunot ang agtang sa gwapa nga polis kay naglibog siya nganong gibinuangan man siya sa iyang bana.

Nasakpan man gud ni Grace ang iyang bana nga samtang nagtrabaho kini nga usa ka drayber og “habal-habal” apan nakigrelasyon kini sa usa ka byuda nga nagpuyo sa silingan nila nga barangay sa ilang lungsod.

Kahilakon na unta si Grace nga naghuna-huna sa iyang kaagi uban sa iyang bana, apan kalit lang mitingog ang message alert sa iyang selpon. Gipunit ni Grace ang selpon ug gitan-aw kun diin gikan ang mensahe.

Si Romeo maoy mi-text kang Grace kay nangutana kun padulong na ba kini sa dapit nga ilang gikasabotan nga magkita. “Coming na Rom… magtaksi ra ko,” ni Grace pa. Samtang nagsakay na sa taksi si Grace, laing message gikan ni Romeo ang iyang nadawat.

“Human nato og dinner karon Grace ayaw ko’g balibari. Adto ta sa mabugnaw nga lawak kay iprobar nako nga dili ka magmahay,” matud ni Romeo sa iyang text message. Wala tubaga ni Grace ang mensahe ni Romeo.

Naglibog siya kun unsay iyang buhaton. (Sumpayan)