Igo lang tig-reply

Dear Tita Salie,

Have a wonderful day. Just call me Ms. Scorpio, I am single and I have boyfriend. Ang akong unang problema mahitungod sa akong boyfriend tungod kay duna ko’y pagduda niya. Ako man god siya perming hangyoon nga mokuyog ko niya ngadto sa ilang pinuy-anan kay gusto unta nako nga akong makaila ang iyang mama ug kun puyde ang iya gyong pamilya.

Apan dili gyod siya mosugot kay matud niya nga pulos kuno lalaki ang namuyo ngadto sa iyang gipuy-an. Masuko pa gyod siya Tita kun moadto ko sa ilaha. Hinungdan nga nagduda na hinuon ko nga duna siya’y gitagoang sekreto. Tingali kun minyo na siya, Tita.

Unya duna ko’y amiga nga dunay uyab. Ug ang iyang uyab magsige og text diri nako. Dihang akong gisultian niini ang akong amiga matud niya nga ako lang replayan aron malingaw usab kay bisi man sa trabaho ang akong amiga.

Hapit na mag-one year ang among pagteksanay. Ug matud sa iyang uyab nga na-develop siya diri nako kay ako kuno ang anaa kanunay naminaw kaniya, kay kanunay walay time ang akong amiga.

Unsa may akong buhaton, Tita, sultian ba nako ang akong amiga bahin niini? Palihog pasabta ko. Daghang salamat sa pagtagad. God bless. -- Ms. Scorpio

* * *

Dearest Ms. Scorpio,

Bisan ako magtuo usab nga dunay gitago ang imong boyfriend diha kanimo tungod kay pure ang imong intention nga mahimamat ang iyang pamilya apan iya kining gihikaw diha kanimo. Busa natural lamang nga imong bation ang magduda kaniya nga tingali kun duna na siya’y kabilinggan. Pero basin usab kun dili pa mosugot ang iyang mga ginikanan nga mag-uyab-uyab siya hinungdan nga dili ka pa niya puydeng ipailaila ngadto sa iyang pamilya.

Busa sa maong sitwasyon dili pa angay nga imong ihatag ngadto kaniya ang 100% nga pagsalig tungod kay dili pa gyod nimo ilado kaayo ang iyang pamilya. Agad-agara una ang mga panghitabo samtang imong hinayhinayon pagsuta ang iyang pagkatawo.

Mahitungod nianang uyab sa imong amiga wala ka may problema kun siya ra ang na-develop kanimo. Wala kay sala kun na-inlove kanimo ang uyab sa imong amiga tungod kay igo ka lang nagbuhat sa gisulti sa imong amiga nga replayan ang text sa iyang uyab.

Mas maayo gyod nimong buhaton nga imong pahibaw-on ang imong amiga sa gibati sa iyang boyfriend karon aron dili ka mamahimong traydor ug maluibon. Aron siya na ang mohukom sa ilang relasyon. -- Tita Salie