Goodbye is not Forever - Gula15

Nanghupaw si Albert. “Dili, Brod. Dili.”

Mitukiki si Eking. May tuno sa pagbugalbugal ug kantalita ang kinataw-an niini.

Mingislo si Albert. Mora’g gilainan siya sa kinataw-an sa iyang higala.

“Dili man kana lisod nga buhaton, Brod,” matud na usab ni Eking nga mipadayon pagsulsol kang Albert. “Managtrato kamo ug natural lang nga adunay panagsang romansa. Nasayod ka niana. Ug bisan siya.”

“Gitahod ko ang iyang pagka-babaye, Brod,” ni Albert pa.

“Nasayod ko niana,” ni Eking pa. “Apan sa inyong sitwasyon karon nga molarga si Josheba sa Canada kinahanglang maneguro ka.”

“Maneguro sa unsa, Brod?”

“Nga maimo na gayod siya bisan unsa pay mahitabo. Ug ang paagi nga akong gisugyot kanimo epektibo kaayo. Ang babaye mobangon kun diin siya mapukan. Ilabi na gayod si Josheba nga usa ka babaye nga utokan. Hayan dili ka na niya lugakan human mo buhata ang gitudlo ko kanimo.

Kahilom.

“Kinahanglang mohukom ka na, Brod,” ni Eking na usab nga mitikdol sa kahimungawong ni Albert. Samtang dili pa ulahi ang tanan.”

Wala motingog si Albert. -- Sumpayan pa