Pulos kinamagulangan

Dear Tita Salie,

Maayong adlaw. Ako gyud nga gipadala kanimo ang akong problema ug manghinaot ko nga imo kong matambagan. Tita, kanunay gyud ko nga mobasa sa imong column ug ganahan gyud ko nga imo sad ko nga matambagan.

Tawga lang ko og Dennis C., 23 years old, nagpuyo sa Mandaue City. Ulitawo pa ko pero dunay 4 kabuok anak nga pulos kinamagulangan.

Daghan man gud ko og nahimong uyab, Tita Salie, ug halos ang tanan nakuha gyud nako ug ang 4 niini nabuntis. Ang tulo kanila wala na koy kasayoran kun hain sila nagpuyo karon kay nasuko man sila nga dili nako sila pakaslan. Apan wala sila masayod, Tita, nga daghan sila sa akong kinabuhi.

Ang usa sa akong nabuntisan ania ra dinhi sa Mandaue ug akong gisustentohan ang iyang anak. Kay duol ra man mi. Pero wala koy plano nga makigminyo sa inahan sa akong anak. Sukad pagkatawo sa among anak ako na ang nagsagubang sa mga gastohan hangtod karon nga 4- anyos na ang bata.

Gusto unta nako nga kuhaon ang bata, Tita, kay wala may ikabuhi ang inahan niini. Ako ra man gihapon ang nagbuhi sa bata. Makuha kaha nako ang akong anak? Unsa may akong buhaton? Palihog pasabta ko. Daghang salamat. God bless.

* * *

Dear Tita Salie,

Maayong adlaw usab kanimo, Dennis. Mora og nagpahimulos ka gyud og maayo sa imong kabatan-on. Wala ka ba maluoy sa imong mga anak nga wala nimo makauban karon, nga dapat gyud unta nga anaa sila sa imong kiliran kay ikaw man ang amahan? Wala ka ba usab maluoy ug maghunahuna sa mga babaye nga imong gipasaligan apan igo lamang giguba ang mga pangandoy ug ugma? Manghinaut ko nga imo nang hinay-hinayon pagtul-id ang dalan nga imong giagian aron wala kanay angay hunahunaon nga bug-at nga suliran ug wala nay laing binuhat nga magmahay sa ilang pagtugyan sa ilang kaugalingon diha kanimo. Ayaw kalimti nga dili gyud maayo ang mopasakit sa laing tawo.

Dili pa gyud nimo dali-daling makuha ang imong usa ka anak nga imong gisuportahan karon. Kay bisan pa man kun muingon ka nga ikaw ang nagbuhi kaniya pinaagi sa paghatag og kuwarta, apan sa iyang pangidaron karon angayan lamang nga anaa siya sa poder ug pag-amuma sa iyang inahan. Ug pilit ka gyud nga mosuporta sa bata bisan kun wala siya magpuyo uban kanimo tungod kay imo man siyang anak.

Huwata nga muabot ang bata og 7 years old kay puwede ka na mo-file, kun gusto nimo nga anha nimo ang custody. Pinaagi sa pagpamatuod nga wala’y ikabuhi kaniya ang iyang inahan ug ikaw ang dunay kaya. -- Tita Salie