Paraygon nga Engkanto Gula 2

Sa kalisang ni Nilo, gibiyaan niya ang babaye ug midagan siya nga wala na mahinultol pagbalik sa iyang motorsiklo nga gipabarug daplin sa karsada.

Nangayo’g tabang si Nilo sa mga tawo nga nagpuyo duol sa usa ka menteryo sa Barangay Lambusan aron makuha niya ang motorsiklo nga iyang gibiyaan. Nagkurog pa gihapon sa kahadlok si Nilo nga milantaw sa dakung kahoy. Wala na ang babaye.

Ang kasinatian ni Nilo iyang gisugilon sa ubang mga drayber og habal-habal didto sa Barangay Bosogon ug Kinawahan. Usa ka drayber og habal-habal nga si Jupet, nanganti nga kun siya ang mahitaboan dili gayud siya mahadlok.

Postorawo og pamorma si Jupet ug nakaestar sa dakbayan sulod sa pipila ka tuig mao nga kuwang siya og pagtoo sa mga engkanto. “Basta, ikaw lang bay kun gusto ka, ako dili na g’yud ko moagi diha panahon sa gabii,” matud ni Nilo.

Usa ka Domingo, nagabhian si Jupet kay namista siya sa Bogo kaniadtong Mayo 27 atul sa pangilin ni San Vicente Ferrer. Lapas na tungang gabii siya nga miuli sakay sa iyang XRM nga motor. Dili paspas ang pagpadagan ni Jupet kay nahadlok siya nga may mga mananap nga mokalit lang paglabang sa karsada.

Pag-abot ni Jupet sa Barangay Tambongon, diha pa siya makahinumdom sa gisugilon kaniya ni Nilo kabahin sa babaye nga iyang gikahadlokan. Gipahinayan pa ni Jupet ang pagpadagan sa motor. Giigmat niya ang iyang mga mata dihang misaylo na siya sa taytayan.

Wala siya’y nakita. Apan pagsaylo niya tungod niadtong dakung kahoy nga nag-umbaw sa dagat, nakadungog si Jupet nga mora’g dunay nagsitsit. Midali siya paglingi ug nakita niya nga dunay babaye nga nagbarug daplin sa karsada. Wala kini sa iyang pag-agi.

Gibalikan dayon ni Jupet ang babaye kay nagtoo siya nga mosakay kini sa iyang motor. Apan kalit siya nga nahinumdom sa gisugilon kaniya ni Nilo, kauban niyang drayber sa habal-habal.

“Sakay ka miss?” gisukna ni Jupet ang babaye. Nakita niya nga mipahiyom lang ang babaye. “Pwede ko nimo ihatud sa Bogo? Pista man gud gidapit ko sa akong amiga,” matud sa babaye.

Kabalibaron si Jupet kay didto na siya gikan ug paingon na siya nga mopauli. Gikan sa Lambusan, 18 kilometros ang gilay-on sa Bogo. Apan sanglit babaye, wala na siya makabalibad. “Salamat ha? Wala na man go’y laing masakyan,” sa babaye pa.

“Ako diay si Jupet. Ikaw unsay imong ngalan?” nagpaila si Jupet sa babaye. “Tawga lang ko og Laarni,” dali nga tubag sa babaye. Sweet kaayo ang tingog sa babaye nga nadungog ni Jupet. (Sumpayan)