Si Kumare Gula 7

Gihakop og dili tiaw nga kakulba si Lorena dihang gitulod-tulod ni Rolan ang pultahan. “Pasudla ko Lor kay gusto ko nga motan-aw sa atong anak,” ni Rolan pa nga daw gusto na gayud nga mosulod. Midali si Lorena pagkuha sa iyang selpon ug gitawgan si Abner. Naghilak siya nga miawhag nga papaulion dayon kini sa balay kay mamugos gayud si Rolan nga mosulod. Nagtuo si Lorena nga high na usab sa drugas si Rolan.

Usa kini sa rason nga magsige lang sila’g away kaniadto hangtud nga nagkabuwag. Hapit na gayud maabli ang pultahan nga naguba sa tantong duot-duot ni Roland. Naghilak na siya nga mihangyo nga dili kini mosulod. “Dili ko nimo mapugngan Lor, gimingaw na sab ko nimo,” ni Rolan pa.

Wala madugay, nakadungog sila og siren sa police patrol car. Mihunong kini atubangan gayud sa balay ug nanganaug ang polis ug kauban nila si Abner. “Dakpa ninyo kanang tawhana sir!” singgit ni Abner sa kapolisan.

“Wala’y dagan ha!” matud sa usa ka polis nga miposas ni Rolan. Gibuksan ni Lorena ang pultahan ug naghilak kini nga migakus ni Abner. “Salamat nga miabut ka dayon Abner kay makasulod na g’yud unta si Rolan sa balay,” ni Lorena pa.

“Sir, dad-on namo kining tawhana sa Mabolo police station kay nakahinumdom ko nga gipangita man kini siya kay dunay warrant sa pagpanglugos. Apas lang unya mo sir sa police station,” matud sa polis.

Gisaysayan ni Lorena si Abner nga si Rolan maoy kanhi niya boyfriend ug amahan sa iyang anak. Nabilanggo g’yud si Rolan kay dugay na diay kini nga wanted tungod sa pagpanglugos og babaye.

“Misamot ang akong pagmahal nimo bebs kay kasaligan ka g’yud diay. Wala ka na magpatintal pa sa kanhi nimo boyfriend,” ni Abner pa. “Nakasaad na ko nga ikaw ra g’yud ang akong panggaon Abner,” matud ni Lorena.

Nagparayganay silang duha. Ang kainit sa ilang mga pagbati misangpot na usab sa pagtagay nila sa kalipay sulod sa ilang lawak. Usa ka Domingo, nanimba sila kauban ang bata. Wala damha, gikahimamat nila ang mga ginikanan ni Lorena. Naggaksanay sila si Lorena ug ang iyang inahan. “Balik na sa balay Lorena kay wala na kami masuko si Papa nimo,” matud sa inahan.

“Mao ba kini ang imong bana Lorena?” nangutana ang amahan. “Ako si Abner sir, pakaslan nako si Lorena ug panggaon sama sa inyong pagpangga kaniya.” Gigakus ni Abner ang umaabot niya nga mga ugangan.  (Kataposan)