Si Kumare

Gula 6

Wala na makatug si Abner pag-abut niya sa iyang gipuy-an kay gihanduraw niya ang matam-is nila nga panag-uban ni Lorena.

Gusto ni Abner nga mag-uban na sila kanunay. Tibuok balay ang giabangan ni Abner ug nakahuna-huna siya nga tanyagan niya si Lorena nga magtipon na lang sila pagpuyo.

Pagkahapon, gikan sa trabahoan mideritso si Abner sa gipuy-an ni Lorena. “Bebs, gusto na unta nako nga adto na unta mo moestar ni Inday sa akong giabangang balay. Pwede ba?” seryoso ang tono sa sinultihan ni Abner.

Naghinuktok makadiyot si Lorena apan sa ngadto-ngadto misugot ra kini nga magtipon na sila si Abner. Sangko sa langit ang kalipay ni Abner nga wala mobalibad si Lorena..

Gitabangan si Lorena sa iyang duha ka barkada pagbalhin paingon sa gipuy-an ni Abner. “Pre, pangga-a baya tawon ning akong amiga ha, buotan baya ni siya kaayo,” giingnan si Abner sa usa ka barkada ni Lorena nga kauban niya nga nagkugos sa anak niini.

Nahimong haruhay ang pagpuyo ni Lorena uban ni Abner. Wala sila magkalisud-lisud kay daku og sweldo si Abner sa iyang gitrabahoang kompaniya. Gani nagpalit g’yud si Abner og air-conditioning unit aron bugnaw ang bata ni Lorena sa iyang pagkatulog.

Pinangga kaayo ni Abner ang bata nga giisip na niya nga iyang anak. Sa laktud, gisaw-an nila ang kalipay nga sama gayud sila sa matuod nga magtiayon.

Mag-inusara lang si Lorena sa balay panahon sa adlaw nga tua sa trabahoan si Abner. Usa ka udto, mipahuway si Lorena tupad sa iyang anak dihang adunay nanuktok sa pultahan.

Midali siya pagtimbakuwas ug gilili kun kinsa ang nanuktok. Mikalit pagkuba ang iyang dughan kay si Rolan nga kanhi niya boyfriend maoy nanuktok. Wala masayud si Lorena kun unsay iyang buhaton.

Apan nakabaton ra gayud siya’g kaisog. Gidung-aw niya sa barandilya sa bentana si Rolan. “Unsay ato?,”  may kabug-at ang tono sa tingog ni Lorena.

“Salamat nga natultolan na tika Lor, gusto ko nga makigsulti nimo, pasudla ko,” matud ni Rolan.

“Gikasubo ko nga dili ko makapasulod nimo kay wala dinhi ang akong bana,” pintok ang pagkasulti ni Lorena. “Tinuod ba nga gipakatawo g’yud nimo ang atong anak? Motan-aw unta ko sa bata ug gusto ko nga ipadayon nato ang atong pagminahalay,” ni Rolan pa.

“Ablihi kining pultahan Lor, palihug lang,” matud ni Rolan nga miduot-duot sa pultahan. Gikulbaan og maayo si Lorena. “Ayaw pagsulod, ayaw g’yud pagsulod kay wala dinhi ang akong bana,” mora’g nagkurog na ang tingog ni Lorena. (Sumpayan)