Rod Duterte isog, tighipos sa mga daotang sagbot

Kun unsay mga pulong nga mogawas sa baba ni Davao City Vice Mayor Rodrigo Duterte, iya gyud ning buhaton. Kun moingon siya sa usa ka drug lord nga: “Kun dili ka mohunong ning imong daotang negosyo, — tika!” Kini matuman. Kun moingon siya hiposon niya ang mga isnatser, kawatan, mangingilad ug uban pang mga daotan basta dili magbag-o sa ilang kinabuhi, kini iya gyu’ng tinud-on. Iya pa ning ibrodkas sa radyo ug telebisyon, una niya himuon.

Mao nga gikahadlokan siya sa mga daotang elemento. Mga drug pushers, tulisan, bigtayim nga mga sindikato, mga brodkaster nga AC/DC ug uban pang mga hinanib ni Satanas nanglayas sa iyang balwarte. Niining bag-o, usa ka big boss sa carnapping gang nga miduhig sa pangalan sa anak ni Duterte, naapil sa listahan sa mga sagbot nga iyang hiposonon.

Atubangan sa media, sama sa naandan, iyang gipalanog ang kaandam niya mohatag og minilyong salapi kutob sa kinsay makapatay ug makahatod sa putol nga ulo niini sa iyang atubangan.

Naisa ang mga kilay sa taga Human Rights sa ilang nadungog ug nasaksihan. Supak sila sa estilo ni Duterte. Gusto nila nga ipaagi og hustong proseso sa balaod ang maong kaso aron kahataga’g due process ang hingtungdan. Gusto nila nga ang korte na maoy mohukom. Ang pangutana: “Fair ba ang timbangan sa hustisya dinhi sa ato? Di ba kini mokiling kun kargaha’g daghang sapi sa kuwartahang sinumbong?”

Namatud-an na nga daghang adunahang kriminal ang nagpabiling gawasnon tungod sa atong balaod nga usahay mapalit sa salapi. Butang nga kaaway kaayo sa buot ni Duterte. Hinungdan, nga siya gyu’y mangunay pagsilhig sa mga sagbot nga nagpasad sa iyang palibot. Gusto ni Duterte nga makab-ot sa tawo ang matuod nga hustisya. Busa sa iyang mga kamot, gipanghipos ang mga abusado, mapalabilabihon, drug lords ug uban pang mga danglog nga kriminal. Nasayod siya nga sala kining iyang gibuhat sa mga mata sa Diyos. Apan nangayo na siyang daan og pasaylo sa Ginoo. Ug ang Labaw’ng Makagagahom na lamay mohukom ni Rod.

Sa Davao City, dili ka mahadlok maglakawlakaw sa dalan nga magsul-ob og alahas. Wala kay makitang manigarilyo sa karsada ug sa mga restawran. Hinuon, anaay daghang sudlanan sa basura nga giplastar bisan diha sa mga gagmay’ng suok. Busa, mahadlok ang mga lumolupyo nga maghugawhugaw. Kay si Duterte di gyud magpanuko sa pagdakop sa mga tawong nakasala sa balaod -- bisa’g ang maong tawo iyaha pang higala.

Tungod sa kaisog ni Duterte, hawan, limpiyo, ug linaw kaayo ang tibuok panagway sa dakbayan sa Davao. Nanglupad ang nagkalainlaing sagbot sa katilingban ngadto sa halayong dapit- nangahadlok nga silhigon ni Rod Duterte ug idan-ok sa basurahan!