Si Kumare - Gula 4

Nanglabay ang mga adlaw sa panagsuod nila ni Abner ug Lorena. Magkanunayan na si Abner sa balay sa iyang batan-ong kumare.

Sanglit arang-arang man ang sweldo ni Abner sa gitrabahoan niya nga kompaniya, gahinan gayud niya og panggasto si Lorena. Hangtud nga miabut ang higayon nga wala damha nagkatagbo ang masi’g nila ka mga pagbati.

“Nganong wala ka man g’yud pul-i pagtabang nako Abner? Kanus-a kaha kutob kining imong pag-antos para nako ug ni Inday?” usa ka higayon gisukna ni Lorena ang iyang kumpare.

Wala dayon makatubag si Abner. Taud-taud, kalma ang tingog ni Abner nga mipasabot. “Ang tinuod, sa sinugdanan nalooy lang kaayo ko sa imong kahimtang bebs, apan sa pagpanglabay sa mga adlaw, akong namatikdan nga may pagbati nga nagpahipi sa akong kasing-kasing nga labaw pa sa atong pagka-kumare.”

“Unsay buot mo nga ipasabot Abner,” ingon sa nagpatuso-tuso pa si Lorena bisan og nakasabut na siya nga dugay ra nga may kaibog kaniya ang iyang kumpare.

Gigunitan ni Abner ang kamot ni Lorena. “I love you bebs. Gusto ko nga maoy mangamahan sa imong anak. Pinangga nako si Inday, ug labaw sa tanan, ako ka usab nga gimahal.”

Ingon sa natuk-an si Lorena kay wala siya makatingog dayon. Nagsagol ang iyang gibati, may kalipay apan may kalibog usab nga mihasul sa iyang kaisipan. “Tuguti ko bebs nga makapadayon sa akong pagpangga kaninyo nga inahan ug anak, isip usa na ka bana,” ni Abner pa.

Wala palandonga ni Lorena nga mapagakus siya kang Abner. “I love you too Abner. Ang tinuod, tungod sa imong kabuotan ngari kanamo ni Inday, anam-anam ko nga nahigugma nimo.”

Naggaksanay silang duha. Swerte sila kay ang mga tagbalay misimba ug sila ra ang nahabilin sa balay niadtong higayuna. Tinukmod sa naghingapin nila nga kalipay, wala nila kapugngi nga nag-abot ang masi’g nila ka ngabil.

Wala tuyoa ni Lorena nga nakahilak siya. “Bebs, naghilak ka na ‘sab. Ngano? Unsay hinungdan?,” nakapangutana si Abner. “Malipayon lang kaayo ko Abner kay may tawo pa diay nga andam mopangga kanako bisan og ingon na niini ang akong kahimtang.

“Akong ipasalig kanimo bebs nga kun naghilak ka man sa kanhi nimo boyfriend, kalipay ang imong maangkon sa atong pagminahalay,” pasalig ni Abner sa iyang girlfriend. (Sumpayan)