Bisan unsay ihatag

Dear Tita Salie,

Maayong adlaw ug kumosta? Pangayo unta ko sa imong mga bulawanong tambag, Tita, tungod kay medyo nagkalawom na man gud kining akong gidala nga suliran. Hinaot unta nga dili ko nimo pakyason ug imo kong tabangan.

Tagoa lang ko sa ngalan nga Jimmy, usa ka ulitawo apan mora og nagapos ko niining akong situwasyon.

Naa man gud koy gikarelasyon karon nga medyo may edad na. Wala man gud koy gugma kaniya apan ako lamang siyang gisakay-sakayan tungod kay maayo man siya kanako. Magulang kaayo siya nako og edad, Tita, 9 years ang among gap.

Karon, Tita, medyo nakuyawan na ko ug gikulbaan tungod kay mora og tininuod na man ang iyaha diri nako ug seryoso na siya. Bisan unsa na lang pud ang iyang ihatag diri nako, Tita. Usahay tagaan ko niya og cellphone, kuwarta ug dagko na ang kantidad, Tita. Kanunay pud ko niya palitan og mga bisti ug pantalon. Maglisod man pud ko og balibad kaniya.

Naa baya koy laing hinigugma, Tita, ug pareho lang mi og edad. Ug siya gyud ang tinuod nakong gihigugma. Wala gyud ko mahigugma niining usa nga kusog kaayong mohatag nako. Unsa may akong buhaton aron masultihan nako siya sa tinuod, Tita? Maikog man pud kong mosulti kaniya. Palihog pasabta ko. Daghang salamat sa imong pagtagad. God bless.

* * *

Dear Jimmy,

Seguro dihang bag-ohay pa lang mo nga nagkaila ug nagkarelasyon niining maong babaye wala ka magdahom o wala nimo hunahunaa nga molungtad ba diay siya kanimo ug magdugay ang inyong relasyon. Mao lamang ang imong gihunahuna nga nalingaw ka ug malingaw ka pa tungod kay iya mang ihatag kanimo ang imong mga gikinahanglan.  Sa laktod nga pagkasulti imo lamang siyang gigamit tungod kay kusog kaayo siyang mohatag ug gigamit ka usab niya tungod kay misugot man ka.

Karon migawas na ang tinuod nimong gibati nga dugay na nimong gitagoan tungod kay dili ka gusto nga iyang masayran ang kamatuoran nga wala kay gugma kaniya tungod kay mahadlok ka nga dili na siya mohatag kanimo. Imo siyang giabusaran tungod kay wala man nimo siya sultihi sa tinuod nimong gibati.

Karon nahinayhinay ka og kagapos sa imong konsensiya tungod kay duna na man kay utang kabubut-on kaniya. Maglisod ka na pagsulti kaniya tungod kay daghan na kaayo siya og nahatag kanimo. Mahadlok ka kun unsay iyang buhaton ug tingali anaa pa kanimo ang kahadlok nga mawagtang siya ug wala na unyay mohatag kanimo.

Please be fair na man. Putla na ang inyong relasyon kun wala gyud kay gugma kaniya. Apan hinay-hinaya siya aron dili siya makalitan. Ayaw na pagdawat sa iyang ihatag aron iyang masabtan nga dunay kausaban.

 -- Tita Salie