Si Kumare Gula 3

Gitanyagan ni Abner si Lorena nga paliton nila ang mga kinahanglanon niya ug sa iyang  anak.

"Daghan bitaw ko og kinahanglanon para sa akong anak Abner apan mauwaw man gud ko mangayo nila ni Mama kay nasuko pa man sila nako. Nalipay ko nga andam ka nga motabang nako apan maikog na kaayo ko nimo," matud ni Lorena.

Mingislo ang nawong ni Abner. "Ayaw na paghuna-huna og kaikog-kaikog diha bebs, ang importante nga katabangan ko ikaw aron dili ka masakripisyo kaayo ug ang imong anak." Arang-arangan nga pagkabutang sila si Lorena apan giantos niya ang kalisud kay nasuko man kaniya ang iyang ginikanan.

Wala gayud makabalibad si Lorena sa tanyag ni Abner kaniya. Didto sa department store, mora'g bana ug asawa tan-awon sila si Lorena ug Abner nga namili og mga sapot para sa bata. Daghang mga sinena, gwantis sa bata, beberon, mga lampin, unlan ug tanday sa bata nga ilang gipalit.

Misamot nga wala gayud makatoo si Lorena dihang mipalit si Abner og kona sa bata. "Kuyaw kaayo bebs nga mayatakan ug mapaakan sa mananap ang bata nga anha ra matulog sa sawog," pasabut ni Abner kang Lorena.

Taud-taud, nakita ni Abner nga mitalikud si Lorena kaniya nga nagpamahid sa iyang mga mata. Nakasabut siya nga naghilak si Lorena. "Unsay nahitabo nimo bebs? May nasulti ba ko nga sakit nga gikahiubos nimo?" gipangutana ni Abner ang iyang batan-ong kumare.

"Wala man Abner. Luha kini sa kalipay nga gikahibalag ko ikaw nga mitabang sa akong kalisod. Ang amahan sa bata wala lang masayud sa among kapait… sa among pag-antos," ni Lorena pa nga nagduko.  Gikuot ni Abner ang iyang panyo ug mainampingon nga gipahiran ang mga luha ni Lorena. "Ayaw na paghuna-huna sa imong boyfriend. Moabut ra ang panahon nga magmahay siya nga iya ka nga gitalikdan," matud ni Abner.

Mora g'yud og duna na sila'y relasyon si Abner ug Lorena kun tan-awon. "Tana, palitan 'sab nato og milk si Inday unya palitan 'sab tika og vitamins kay aron dili ka mohugo kay wala ka ra ba'y kinatulgan," giingnan ni Abner si Lorena.

"Subra na g'yud kaayo ang imong gihimo nako Abner. Kining imong gihimo nako, wala g'yud kini mahimo sa akong boyfriend kaniadto," ni Lorena pa nga mitan-aw kang Abner. Napuno ang baggage compartment sa taksi nga ilang gisakyan ug nahuot sa back-seat ang kona nga ilang pinalit.

Human nila mapahimutang sa kwarto ni Lorena ang mga pinalit, nananghid si Abner nga molakaw na. "Mobalik ra unya ko bebs," matud ni Abner. (Sumpayan)