Ang tawo nga duhay dagway

Tapos sa “Fine Arts” si Venus ug daghan na siyang giapilan nga bangga sa pagpinta apan wa pa gyud siya kadaog. “Unsa may imong gustong ipinta, Venus, aron makadaog ka?” nangutana ang iyang bana nga si Sam.

“Gusto nakong ipinta ang dagway sa kaaghop ug sa kabuotan.”

“Kadaghan diha nga aghop ug kabuotan ang panagway. Naay atong silingan nga buotan kaayo’g hitsura, si Ramonito.”

“Buotan og hitsura, ngil-ad nama’g kinaiya. Ang gusto ko, aghop  ug buotan ang hitsura hasta ang tinuod niyang kinabuhi.”

Sa pagsuroy-suroy ni Venus aron mangita og modelo, may nakit-an siya. Iya kining gisusi ug giimbistigar. Ug napamatud-an, bisan sa mga silingan nga si Conrado, usa ka 15 anyos nga lalaki, buotan ug maaghop ang hitsura. Sa dihang misugot si Conrado nga mahimong modelo, gisugdan dayon ni Venus ang pag-debuho. Sa pagkahuman niini, iya kining giapil sa bangga sa debuho.

Nakadaug kini sa unang ganti, busa bisan dako ang gibayad ni Venus kang Conrado, nabawi pa niya ang iyang gasto ug dako pa kaayo og subra ang iyang premyo.

Tungod niini, nadasig si Venus sa pagdebuho. Milabay pa ang daghang mga tuig. Nangita si Venus og modelo sa usa ka tawo nga isog ug tinuod gayud nga wala’y gikahadlokan. Giadto niya ang mga prisohan. Didto sa usa ka prisohan, iyang kaila ang warden.

“Uy, Venus!” Timbaya sa warden nga iyang higala. “Ngano gong naabot ka dinhi?”

“Nangita ko’g modelo dinhi sa imong prisohan.”

“Modelo? Unsang matang sa modelo?”

“Kanang tawo nga way gikahadlokan. Isog ang hitsura, apan puno sa pagbasul sa tanan niyang gibuhat nga kadautan.”

“Kun duna ko’y ihatag tawo, asa man nimo dad-a?”

“Anhi ra sa sulod sa prisohan, ako siyang ipinta.”

“Kanang tawhana nga kasulti sa iyang asawa nga pareho silang naghilak kay nagbasul ang bana sa tanan niyang gibuhat.”

Giduol ni Venus ang lalaki ug gipakigsultihan hasta ang asawa nga bayran kini kun mosugot nga himuong modelo. Miuyon ang lalaki aron may ikahatag siyang kuwarta sa iyang asawa.

Busa pagkaugma, dala ang iyang mga gamit sa pagpinta, gisugdan dayon ni Venus ang pagpinta sulod sa prisohan. Tulo ka adlaw una mahuman ang pagpinta ni Venus ug gibayran niya ang asawa nga nag-apong sa iyang bana samtang kini gidebuho.

“Nahimo na sab kong modelo, ma’m sa pagdebuho,” matud sa priso.

“Ha! Kanus-a man?’

“Didto sa among balay, napulo ka tuig na ang miagi.”

“Ikaw si Conrado, ang buotan ug aghop ang hitsura nga akong modelo. Unsang hitaboa nga naingon ka niini?”

“Tungod sa kadako sa kuwarta nga imong gihatag ma’am, maong naingon ako niini. Apan karon, dili na kay ang kuwarta nga imong gihatag ang asawa ko ang nagkupot.” (Kataposan)