Gibuksan ni Lorelie ang gamay’ng box nga gihatag ni Robert kaniya. Kalit nga napasiyagit si Lorelie sa kalipay pagkakita sa sulod sa gamay’ng kahon. Usa kini ka gold necklace nga naggilaw-gilaw sa kasidlak.
Gipunsisokan si Lorelie sa iyang mga paryente ug mga silingan. Midistansya si Robert apan wala mobuwag sa pagsud-ong kang Lorelie. “Salamat kaayo Bert. Kadaghan na sa imong gift nako uy,” ni Lorelie pa nga migunit sa bukton sa ulitawo.
Mibalik ang mga bisita ni Lorelie sa paglingkud. “Isul-ob na kanang gold necklace nga akong gift para nimo,” matud ni Robert. Gituman tuod ni Lorelie ug gisab-ong sa iyang liog ang nagsidlak-sidlak nga kwentas. Taud-taud, nag-iyahay lang sa pagbiya sa balay ang mga bisita nga natagbaw gayud sa ilang panihapon. “Salamat kaayo Lorelie, Robert,” matud sa iyaan sa dalaga sa dayong biya niini.
“Mahal g’yud tingali kaayo ning maong kwentas Bert no kay sidlak man, mora’g pure g’yud nga bulawan,” ni Lorelie pa nga karon pa nakabaton og gold necklace. “Mauwaw ko mohatag kanimo og baratuhon Lor,” ni Robert pa.
Pareho nga nagpahiyom lang nga nagtan-aw ang mga ginikanan ni Lorelie. “Nong, Nang, pwede ba og isuroy nako makadiyot si Lorelie? Gusto nako nga malingaw g’yud siya sa iyang birthday.. mag-disco ra mi diha sa Salinas Drive,” ni Robert pa.
Hapit magkadungan og tubag ang mga ginikanan ni Robert nga wala sila’y pagsupak nga dad-on niini’g suroy si Lorelie. Misulod si Lorelie sa kwarto ug nangareglar sa iyang kaugalingon.
“Dong karon pa kita nagkakita ug nagpasalamat ko nimo nga imong gitabangan si Lorelie sa iyang pagtoon. Walay gilimod ang among anak sa imong mga pagtabang kaniya gikan sa paglibre sa iyang pagkaon, paghatag og pocket money ug uban pa. Sa laktud, wala ko’y pagsupak kun magkahinigugmaay kamong duha,” giingnan si Robert sa amahan ni Lorelie.
Klaro kaayo nga nakasabut ang amahan ni Lorelie nga may gusto si Robert sa iyang anak. Migawas si Lorelie. “Wow kagwapa,” wala makapugong si Robert sa paglitok sa iyang mga pagdayeg sa dalaga.
Human makapananghid, nanglakaw dayon sila si Robert ug Lorelie. Ang mga silingan nga ilang gilabyan nahatutok gayud kanilang duha. Wala magdahum si Lorelie nga may sakyanan diay si Robert nga gi-parking daplin sa karsada.
“Duna ka diay sakyanan Bert?” ni Lorelie pa sa dayon niyang sulod sa kotse. “Yes, giswerte man gud ko sa akong negosyo nga pungko-pungko mao nga dali ra ko nga nakapalit og kotse.” (Sumpayan)