Pungko-pungko

Gula 5

Wala gayod makatuo si Lorelie nga mahimong bongga ang pagsaulog sa iyang birthday. Daghang mga pagkaon ang gipahatud ni Robert nga wala gayud paabota sa dalaga.

“Salabtunon na g’yud kaayo kining gihimo ni Robert kanimo Lorelie. Sa akong tan-aw mora’g nakagusto siya nimo,” matud sa inahan ni Lorelie. “Mao ba Nay?” sa dalaga pa nga nakapahiyom sa iyang nadungog.

Giplastar nila sa lamesa ang pagkaon nga gipadala ni Robert. “Unya hain man karon si Robert day? Maayo unta og moanhi siya,” matud sa inahan ni Lorelie.

Nangabut ang mga iyaan ug ig-agaw ni Lorelie pagkasayud nga dunay gihatud nga pagkaon alang sa birthday party sa dalaga. Nangaon sila ug maoy gitapuk-an ang init-init pa nga litson.

Dugang mga bisita nga mga silingan nila ni Lorelie ang nangabut. Pulos nagpahiyom nga miduol sa wala na mahitsura nga litson. “Kabongga baya sa birthday nimo gaw. Ingon pa nimo gahapon wala kay kwarta?” matud sa iyang ig-agaw.

Igo lang mingisi ang dalaga. “Lorelie, diay nangita nimo!” usa ka silingan sa dalaga ang misinggit sa gawas. Mitambo dayon ang dalaga sa bentana ug maoy misugat sa iyang mga mata ang bayhon ni Robert.

Nakaginhawa og lawom si Lorelie. Wala dayon siya makatingog. “Dayon Bert, dali nangaon na baya mi,” ni Lorelie nga misugat ni Robert sa pultahan. Nahilom ang mga bisita ni Lorelie pagsulod na ni Robert sa balay.

Nangatahuran si Robert sa mga bisita ni Lorelie, ilabi na sa mga ginikanan sa dalaga. Gitunolan siya’g plato ni Lorelie. “Wala pa baya na siya mokaun Dong, sige pagdungan mo’ng duha,” matud sa inahan sa dalaga.

Diha kang Robert ang tanang mata sa mga bisita. “Mao diay ni ang mibangka sa imong birthday Lorelie? Mao diay ni ang umaabot nako nga pag-umangkon?” gikomedyahan si Robert sa usa ka iyaan sa dalaga.

Nagdungan sila sa pagpangaon. Dayon, may gikuot si Robert sa bulsa sa iyang jacket. Usa ka gamay’ng kahon.

Gitunol dayon niya kini kang Lorelie. “Happy birthday,” nagpahiyom si Robert nga mitutok kang Lorelie.

Mihugyaw ang mga bisita ni Lorelie. “Kaswerte ni Lorelie uy! Swerteha ni agaw ah!!

Mahalon g’yud na ang sulod ana kay pagamay-gamay lang na pero mahalon ang sulod,” lainlaing reaksyon sa mga bisita ni Lorelie nga masabut nga naibog kaayo sa iyang sitwasyon. (Sumpayan)