Pungko-pungko Gula 3

Gilantaw ni Robert ang nagkalayo nga bayhon ni Lorelie. Nadungog ni Robert ang mga kaklase ni Lorelie nga nagsultihanay. “Daghan lagi to og kwarta si Lorelie, atong pabangkahon,” matud sa babaye nga kauban sa grupo.

Gihuna-huna ni Robert kun unsa kaha ang gibati ni Lorelie nga iyang gihatagan og kwarta nga gipatuo niya nga sukli sa iyang gibayad. Minus na ang mga mipalit og pagkaon sa rolling store ni Robert.

Nanghipos na si Robert sa iyang mga baligya apan kalit lang mitungha si Lorelie sa iyang luyo. “Bert, nganong duna man ko’y sukli nga wala man ko maghatag nimo’g kwarta? Gilibre man gani ko nimo sa akong gikaon?” Nakapahiyom si Robert dungan sa paggunit sa bukton ni Lorelie nga nagkumkom sa kwarta nga iyang gihatag kaganina. “Ako nang gihatag nimo Lor, ug aron dili mahibaw-an sa imong mga classmates, ako lang giingon nga sukli.”

“Subra na man kaayo Bert ang imong kaayo nako,” matud ni Lorelie. “Sagdi lang Lor, giswerte man ‘sab ko sa gamay nako nga negosyo, ako na lay hatag nimo sa imong budget para dili ka maundang sa imong pagtoon,” matud ni Bert.

Wala makatingog si Lorelie. Igo lang siya nga mitutok kang Robert. “Sigi, salamat kaayo sa imong pagtabang nako ha, dili g’yud ko makalimot sa imong tabang. Tinuod bitaw, nabalaka ko nga dili na makatungha kay wala pay trabaho si Papa.”

Mipahiyom ra si Robert nga naminaw. “Ayaw kabalaka Lor, sultihi lang unya ko kun tingbayad na sa imong tuition kay ako ka nga hatagan og kwarta.

Oki?” Nasayud si Robert nga nalipay kaayo si Lorelie nga iyang gipasaligan og tabang aron dili maundang sa iyang pag-eskwela. Moganansya si Robert og tag P4,000 sa iyang pagpamaligya og pagkaon gikan sa hapon hangtud gabii.

Wala magmahay si Robert nga gisudlan niya kining negosyoha kay bisan og kapoy, daku-daku man siya og maganansya. Milabay ang pipila ka adlaw.

 Miduol sa tindahan si Lorelie. Giandaman dayon kini’g makaon ni Robert apan daw nagdali ang dalaga. Mora’g nasabtan ni Robert nga adunay gusto nga isulti kaniya si Lorelie.

 “Kaon na,” iyang giingnan ang dalaga. “Exam namo ugma Bert ug wala g’yud makahuwam og kwarta si Mama,” daw sa subo kaayo si Lorelie.

“Walay problema, giingnan na bitaw tika nga sultihi lang ko kay ako’y bayad. Pila’y imong tuition Lor?” ni Robert pa nga mikuot dayon sa iyang pitaka.

Gitunolan niya’g P3,000 si Lorelie. Bisan og wala mopahiyom si Lorelie apan nasabut ni Robert nga nalipay kaayo ang dalaga. (Sumpayan)