Pungko-pungko Gula 2

Nahibulong si Robert kay duha ka adlaw nga wala motunga sa iyang rolling store si Lorelie. Nagpakisayod si Robert sa mga kanunay’ng ikakuyog ni Lorelie ug nasayran niya nga misulod man sa klase ang dalaga.

“Tua ra man to siya sa classroom namo dili man mouban nga among gidala. Gimingaw kang Lorelie Bert? matud sa babaye nga classmate ni Lorelie.“ Ang tinuod, husto ang classmate ni Lorelie nga gimingaw si Robert sa dalaga.

Pagkaugma, mitunga si Lorelie sa tindahan ni Robert. “Sori kaayo Bert ha kay karon pa ko nakatigum og para bayad sa akong utang mao nga wala ko moari nimo bisan gutom,” sa dalaga pa.

Seryoso kaayo nga mitutok ug naminaw si Robert sa gisulti ni Lorelie. Nag-inusara ang dalaga nga miadto sa iyang tindahan.

“Nataktak man gud si Papa sa iyang trabaho mao nga nagsalig usa mi karon sa gamay’ng kita sa akong inahan sa pagpaninda,” matud ni Lorelie. Nakapanglingo-lingo si Robert nga naghuna-huna sa sitwasyon sa dalaga.

“Lor, ayaw og hatagi’g kahulogan. Tabang nako nimo ni nga mentras wala pay trabaho si Papa nimo, librehon tika sa snack dinhi, ato ra ning duha ug dili masayud ang imong mga classmate,” matud ni Robert.

“Ayaw uy, dili ko. Mauwaw ko Bert. Agwantahon lang nako ang gutom,” ni Lorelie pa nga klaro kaayo nga nauwaw. Gigunitan ni Robert ang iyang bukton ug gipasabut nga walay kapin kabubot-on ang iyang pagtabang.

Giandaman ni Robert og makaon si Lorelie. “Sigi na, kaon na Lor. Ayaw ko’g balibari kay gusto ko nga makatabang nimo.” Wala tuod mobalibad si Lorelie apan klaro kini nga gibati og kauwaw.

Taud-taud, nangabot ang mga classmate ni Lorelie. Igo usab siya nga nahuman sa pagkaon. “Ah, miuna ra man og snack!” matud sa komedyante nga classmate ni Lorelie.

Nananghid si Lorelie sa iyang mga classmate nga mouna lang kay duna pa kini atimanon sa classroom. “Lor, dia ra ang imong sukli o,” matud ni Robert nga mitunol kang Lorelie sa kwarta nga gipilo-pilo.

Nahatutok si Lorelie kang Robert kay nahibulong siya nganong duna man siya’y sukli nga gilibre man gani siya’g snack. Gikiloan siya ni Robert ug gipakumkom kaniya ang kwarta.

Milakaw si Lorelie nga walay tingog-tingog. (Sumpayan)