Pangindahay sa libre nga serbisyo sa kagamhanan

Ang libre ug maayong serbisyo sa gobiyerno mao gayod ang pangindahay sa daghang mga tawo kay sa maong paagi dili man nila magasto ang ilang salapi ug magamit usab nila sa lain pa nilang panginahanglan sa ilang pamilya.

Ang sagad sa gipangatarungan sa mga nangindahay og libre ug maayong serbisyo tungod kay nangulekta na og buhis ang gobiyerno gikan sa mga tawo ug makiangayon lamang nga ihatag kanila ang libre ug dili mobayad kay “Burn Free” lagi.

Naglakip sa mga serbisyo nga gikinahanglan unta nga malibre mao ang  pagpatungha sa ilang mga anak sa publikong tulunghaan nga maoy hinungdan nga kun mangayo na gani og amotan ang mga magtutudlo masugamak kini sa mga reklamo ug pagsaway.

Gumikan niini magpanagana ang mga kadagkoan sa tulunghaan sa kagamhanan sa pagpangayo og amotan sa mga ginikanan nga ang tumong mao ang maayo untang kahimtang sa sulod sa tulunghaan sama sa limpiyo nga pansayan, hayag nga sugang dagitab,  limpiyong tubig nga mainom ug ang paghatag og kasiguroan sa tulunghaan pinaagi sa ilang pag-hire og security guard nga mobantay niini.

Ang maong mga tawo nga nangindahay og libre ug maayong serbisyo kun masinati na gani sa dili maayong kahimtang sa gipatungha nilang mga anak sa nahisgotang tulunghaan mao usab kini ang kusog kaayong moreklamo ug mapuno sa pagsaway ang mga nagdumala sa tulunghaan.

Kini ang hinungdan nga ang publikong tulunghaan bisan kun gipadagan kini ubos sa kagamhanan sa gihapon adunay ginagmay nga kolektahon apan ang kantidad gikauyonan sa Parents Teachers Association (PTA) sa maong tulunghaan.

Mao usab ang mga tambalanan nga gipadagan ubos sa kagamhanan nga ang mga pasyente dili gayod hingpit nga malibre tungod kay mobayad man gihapon apan ubos hinuon kun itandi sa tambalanan nga pribado.

Gumikan sa maong kahimtang ang mga nagtinguha og libre ug maayong serbisyo gikan sa gobiyerno lisod gayod nga matagamtaman ug magpabilin na lamang kining pangindahay. (Romeo  T.  Limpangog)