Pungko-pungko

Human si Robert mi-resign sa iyang trabaho sa usa ka kompaniya, nakahukom siya nga gamiton ang nakobra niya nga pabawon alang sa gamay’ng negosyo. Gi-convert ni Robert ang iyang multi-cab isip mobile-restaurant.

Apan sanglit ang iyang negosyo anha ra man daplin sa karsada, gitawag kini sa uban og “pungko-pungko.” Magdala usab hinoon si Robert og plastik nga kalingkoran sa iyang mga kustomer anha sa aseras.

Apan kadtong wala na’y kalingkoran, magbarug na lang sa aseras. Magbalhin-balhin si Robert sa pagparking sa lainlaing dapit dinhi sa dakbayan. Kanang inig dayong tik-up sa kagabhion, adto siya mo-parking duol sa usa ka ospital.

Kuninitan dayon sa mga nurse, ug duna pay mga doktor, ang iyang baligya nga pinirito nga mga hiniwa nga manok ug adobo. Mga tigbantay sa mga pasyente apil sa iyang mga kustomer.

Lapas sa alas siete, mobalhin na ‘sab si Robert duol sa usa ka tunghaan dinhi sa dakbayan kay ang iyang target mao ang mga tinun-an. Tagdagku g’yud og ganansya si Robert niining iyang negosyo mao nga dali ra siya nga miasenso.

Usa sa nahimong suki ni Robert mao si Lorelie nga mikuha sa kurso nga Bachelor of Science in Commerce. Usa ka gabii, nakabantay si Robert nga wala mo-order si Lorelie og iyang pagkaon. Diha ra kini nagbarug sa daplin nagtan-aw sa iyang mga kaklase.

“Ikaw Lor, unsa may imong order?” gisukna ni Robert ang dalaga. “Pass usa ko ron Bert kay wala’y budget. Sa balay na lang ko mokaon,” hinay ang tingog ni Lorelie nga mingisi og hilaw.

Ingon sa nalooy si Robert. “Sige lang, unya na lang bayari kun may budget ka na. Unsa may imo?”

Kadto maoy nakapasabot sa ilang kasuod ni Robert ug Lorelie. “Nakabasa lagi ko sa newspaper Bert nga dili na mo tugotan nga mamaligya og pagkaon sa aseras,” ni Lorelie pa ngadto ni Robert.

“Mao lagi, maayo unta og malooy namo ang mga opisyal sa dakbayan kay tinarung man tawon ning among negosyo,” ni Robert pa samtang nag-ukay sa gipirito niya nga hiniwa nga karne sa baboy ug manok. Bisan wala pa mangayo si Lorelie apan gitunolan na og softdrinks ni Robert ang dalaga. Nasayud siya nga magpanuko kini sa pagpangayo og mainom kay wala man siya’y budget niining higayona.

“Salamat kaayo Bert ha, manggihuna-hunaon ka g’yud kaayo,” matud ni Lorelie nga mitutok kang Robert. Nalooy sa hilom si Robert kang Lorelie kay dugay na siya nga nakabantay nga tihik-tihik gani ang order niini kun mukaon. (Sumpayan)