Nagpinal nga naayo sa baho sa asawa

Lugos na makabuka sa duha ka mata si Nisyo, nga giapungan ni Digna. Sa hunahuna ni Digna, sayang kaayo nga mamatay ang iyang bana ilabi na nga tangkod pa lang og walo ka buwan diin gikahiusa ang salag sa ilang kaminyoon ning dako nilang simbahan sa lungsod sa San Fernando.

Gani, manumbaye pa man may ngilit sa panumdoman ni Digna, nga sa dihang unang gabii human sa ilang kasal ... iyang natagamtaman, giunsa nilang duha pagtiti ang kataposang lawog sa nagdin-a nilang katagbawan.

“Makamao ka man lagi Nisyo nga mopalami kanako? Daghan man god nag-ingon sa atong mga silingan ning atong balangay sa Kabatbatan, nga bayot ka kuno?” ni Digna pa nga nag-udhak ang tuno sa sinultihan.

“Karon mobilib na gayod ka kanako? Ako pa?” daling tubag ni Nisyo ... nga wa lung-i ang asawa kun kanus-a maluya.

Miabot ang wala palandonga ni Digna, sa dihang naglisod na sa pagginhawa ang iyang bana? Gumikan lagi sa naghinubra nga pagdaginot, aron makatukod sila og balay nga bag-o ... gisakripisyo na lang ni Nisyo nga mamahaw og sinugbang kamoteng kahoy samtang kini magdaro. Apan naunsa ba hinuon nga pagkaunsaa ... nga nahilo man si Nisyo, gikan sa nahilaw nga kamoteng kahoy nga iyang gisugba?

“Mas maayo na lang tingali Digna nga andaman na lang nimo og lungon si Nisyo kay sa akong paminaw sa akong paghimulso panagsa naman lang mopitik ang iyang kasingkasing?” ni Ingko Masyong pa ang giilang maayong laki nga manunutho sa may bukiran sa Kabatbatan.

Ingon sa naamang sa makadiyot si Digna. Unsaon na lang kun mamatay ang iyang bana? Nagsabak na ra ba siya?” dihay kalibog nga mitukbil sa hunahuna ni Digna.

Gumikan sa iyang kabalaka ... nagpunay na lang siya og pangawot sa nagkadaiyang parte sa iyang lawas. Ambot unsang hitaboa nga diha may naghinubra nga kakatol sa iyang bilahan?

Gumikan tingali kini nga tangkod nang duha ka buwan nga wa siya makaligo sa ilang atabay? Nagpadayon siya sa pagpangawot.

Wa lang tuyoa ... napaduol niya ang iyang tuong kamot sa may ilong ni Nisyo ug sa dakong kahibulong mikalit og bangon ang iyang bana nga nagpinal.

“Kahumot gud adto Nisya nga baho nga imong gipasimhot kanako? Pasimhota pa kuno ako pag-usab?” nagkayuring ang tuno sa sinultihan ni Nisyo.

Igo lamang nga gibawsan og pahiyom ni Digna si Nisyo nga giganahan diay sa baho gikan sa iyang bugan nga nangalisbo na og patay ang ilaga gumikan sa taudtaod na niyang wa makaligo. (Kataposan)