Ang bagyong Ofel

Gula 6

Lapas na alas nueve sa gabii nga miabut sila si Arnel ug Joy sa balay sa dalaga. Nakabantay sila nga mingaw ang palibot, mora’g wala’y tawo ang balay.

Diha pa makabantay si Joy nga gi-double lock ang pultahan sa ilang balay nga nagpasabot nga walay tawo sa sulod. “Hain kaha sila si Mama ug Papa?” matud ni Joy nga mikuha sa iyang yawe gikan sa bag.

Gihapit niya og kuha ang iyang selpon. Diha pa makabantay si Joy nga na-off diay ang iyang selpon… walay power. Human mabuksi ang pultahan, gipasiga ni Joy ang suga ug giagni si Arnel nga mosulod.

Gisuwayan pag-on ni Joy ang selpon. Taud-taud nagpusot-pusot ang messages gikan sa iyang Mama. Diha pa masayri ni Joy nga ang iyang mga ginikanan uban sa iyang manghud mibilar sa higala nila nga namatay.

Nasayod si Joy nga sama kaniya gigutom na usab si Arnel. Nagsukad si Joy og ilang makaon. Diha sila sa sala nagsultihanay human sa ilang pagpangaon. “Dali ra kaayo kita nga nagkarelasyon Arnel no? Basin imo lang ko nga binuangan,” ni Joy pa.

Gipasaligan ni Arnel ang iyang girlfriend nga hangtod sa hangtod siya nga magmahal kaniya. “Ummm, basin kutob ra na sa dila ang imong gisulti,” paraygon ang tingog ni Joy.

Takulahaw lang nga giangklahan dayon ni Arnel ang hawak ni Joy samtang sila naglingkod. Milingi si Joy sa iyang boyfriend ug mipahiyom. Nagtinutokay silang duha ug tagsa-tagsa sila nga gianod sa ilang mga pagbati.

Wala nila palandunga nga naggaksanay na silang duha ug gibuhong ni Arnel sa mga hawok ang iyang girlfriend. Gipahigda ni Arnel si Joy ug gipaunlan sa duha niya ka paa samtang naglingkod siya sa hunol-hunol nga lingkoranan.

Pabor kaayo si Arnel sa pag-ukob sa mga ngabil ni Joy samtang nag-unlan ang dalaga sa duha niya ka paa. Milihok dayon ang mga kamot ni Arnel sa paghapohap sa dughan ug tiyan ni Joy.

Nakabantay si Arnel nga gigilokan si Joy sa iyang gihimo apan wala usab kini moawhag kaniya nga ipahunong ang iyang gibuhat.

Nag-anam na kainit ang ilang pagparayganay. Halos dili na maagwanta ni Arnel ang grabeng kalalim nga iyang gibati. Nasabtan niya nga ingon na usab niini ang gibati ni Joy.

“Joy pwede’g mamalhin ta sa imong kuwarto,” hagawhaw ni Arnel sa dalaga. Kabalibaron unta si Joy apan gipaundayonan ra niya si Arnel. (Sumpayan)