Kalag nga mibalik

Ang kabugnaw sa huyohoy sa tungang gabii maoy nagpukaw kang Maylinda sa iya untang halawom na nga paghinanok ug dihang namatikdan nga naabli ang bintana sa iyang lawak wala kini maglangan sa pagbangon alang sa pagsira niini.

Sa pagduol ni Maylinda sa bintana sa iyang lawak maoy namatikdan niini ang kusog kaayong paghuros sa bugnaw nga hangin nga nakapakurog kaniya sa hilabihan nga gibating katugnaw.

Bag-o pa nga nabiyuda si Maylinda sa iyang bana nga si Itok nga namatay sa urom nga maoy hinungdan nga sa matag gabii sa iyang pag-inusara kanunay pa gihapon niyang mahinumdoman ang mga panghitabo sa adlaw nga iyang nadiskubrehan nga mituskig na kini sa gihigdaan ug hangtod na paghaya sa patay’ng lawas nga ilang gibilaran sulod sa usa ka semana.

“Hu! hu! hu!” ni Maylinda pa nga midanguyngoy sa paghilak sa atubangan sa patay’ng lawas ni Itok nga wala na maglihok  sa katre nga gihigdaan niini.

“Mag-unsa na man lang tawon ko ani, Tok nga nag-una-una ka man diha’g kamatay,” ni Maylinda pa nga nagpadayon sa iyang paghilak.

Nahidangat ang taga punerarya nga maoy miugkat sa patay’ng lawas ni Itok sa iyang gihigdaan ug gikarga kini sa ilang sakyanan alang sa pag-imbalsamar.

Gibalik sa taga punerarya ang patay’ng lawas ni Itok nga gisulod na sa lungon ug gisugat usab kini ni Maylinda nga wala pa gihapon mohunong sa iyang paghilak.

Samtang nag-atubang si Maylinda sa haya sa iyang bana maoy iyang nakita ang tulo ka numero nga gipatik sa gisudlan niining lungon nga maoy nakapahunong sa iyang paghilak.

Nagdali si Maylinda sa pagtindog ug migawas sa ilang panimalay ug sa paglabay sa pipila ka gutlo nahibalik kini nga daw saya na kaayo ang panagway nga daw wala na batia og kaguol sa kamatayon ni Itok.

Dihang sirhan na unta ni Maylinda ang bintana sa ilang panimalay wala lamang damha nga iyang nabati ang nagdahunog nga tingog sa iyang bana nga daw gikan sa ilawom sa yuta nga nagsampit kaniya.

Gianinaw niya ang palibot ug maoy iyang nakita si Itok nga daw naglutaw sa hangin nga mapahiyomon kining nagtan-aw kaniya.

“I-itok,?” ni Maylinda pa nga nakalitan. “I-ikaw na?”

“O,” tubag usab sa iyang bana nga nagpakita nga usa na ka kalag niining higayona. “Nakadaug ka sa numero sa swertres nga akong gihatag ug dili ko mahimutang kun dili ka manghatag og barato.”

“B-barato?” ni Maylinda pa nga nagpadayon sa iyang pagkurog. “U-unsaon man nako paghatag,” pangutana pa niini sa kalag sa iyang bana nga nagpakita kaniya.

“Pamisahe lang ko sulod sa tulo ka Domingo,” nagkanayon niini ang kalag ni Itok. “Kay sa maong paagi madali usab ang akong paggawas gikan sa purgatoryo ug mahingpit na ang akong pag-adto sa langit.

Ug tuod man gihimo ni Maylinda ang gisulti sa kalag ni Itok ug sukad niadto wala na gayod kini magpakita pa kaniya hangtod niining  panahona 20 na ka tuig ang nakalabay. (Katapusan)

G   R   E   E   T   I   N   G   S

Happy birthday to  HONEY CABURNAY karong adlawa Oktubre 31, 2012. Greetings gikan ni mommy Ging-ging, Britney, Yankee ug  Sam Gian.

* * *

Belated birthday greetings  to JUN “ONICK” PADILLA. Greetings from  your  wife brgy. councilor Cherryl “Gege” Padilla, son Jethro Ray Padilla, family & friends.

* * *

l Happy birthday to MS. JENNY DURAN of Poblacion, Compostela Cebu who’s celebrating her birthday today October 31, 2012. Greetings coming from your mama & papa, ate, Jastin, brothers and sisters and also Duran family.