Tindero’g syakoy Cebu City

Syakoyyyy! Syakoy mo diha...!” “Abtik nga mitimbakuwas pagbangon si Nimfa sa gihigdaang lawak ug nagdaling nanambo sa bentana dihang nadungog na sab niya ang tingog sa tindero’g syakoy nga nahimo na niyang suki matag alas tres sa hapon si Norman!

“Norms...! Dali, saka diri sa itaas. Mopalit na sab ko’g syakoy!” singgit ni Nimfa nga mikamay sa tindero’g syakoy.

Ganahan si Nimfa sa templada sa syakoy nga baligya ni Norman, nga maoy naandan na niyang pang-esnak  matag alas-tres sa hapon.

Naay daghang syakoy nga tinda sa ilang dapit sa Hipodromo, apan mas lami gyud ang templada sa syakoy ni Norman nga isuroy niini.  Gaan siya’g buot sa guwapong tindero’g syakoy nga dili lumad sa Hipodromo, apan nakabaton og daghang mga suki sa tindang syakoy nga isulod sa dakong basket ug isuroy mata’g adlaw.

Mapahiyumon si Norman nga misaka sa itaas sa dos andanang balay ug giduol ni Nimfa nga naglingkod na sa halapad nga sopa.

“Basta ikaw, Nim, unahon gyud nako sa pagpapalit sa tinda kong syakoy. Suki gud nako ang guwapang call center agent...!”

“Saon nga kinaham ko naman ang tinda mong syakoy, Norms. Makamata gyud ko ning orasa sa hapon inigkabati nako’s imong tingog! Lami kaayo ang imong syakoy...!”

“Natural! Ako gyu’y nangunay og luto ning maong mga syakoy, Nim. Sa among dapit sa Carreta, ako ang nainila nga tigluto og syakoy. Kay ilong tuwapos ug wa nay mga ginikanan, mao ni ang nahimo kong panginabuhian. Palamian gyud og templa. Ganahan kong mosuroy dinhi sa Hipodromo kay nakabaton ko’g daghang suki. Ilabi na nga suki tika, Nim...!”

“Ang imong asawa diay, Norms...?”

“Ulitawo pa ko, Nim! Sa edad nga 30, wa koy kurso nga mangulitawo’g babaye kay tindero’g syakoy lang gud ko! Hinuon, syakoysyakoy lang ning tinda ko, apan sa akong kakugi sa pagluto ug pagsuroy, dili momenus nga mag-adlaw ko’g kinintos pesos...!”

“Tiaw mo na? Tindero’g syakoy nga guwapo...!”

“Salamat, Nim! Pero sa sama nako nga tindero’g syakoy, imposible gyud nga makauyab og sama nimong guwapa nga call center agent nga gradwado sa Computer Science...!” ni Norman nga mipasiklap sa mubong sayal ni Nimfa, diin nawiwi ang duha ka bugol nga paa niini ug naklaro ang haklap sa buganan.

“Depende sa babaye, Norms...!” ni Nimfa nga nakamatikod sa tinutokan sa tindero’g syakoy nga miungot sa iyang bilahan. Misamot nga gibila ni Nimfa ang duha niya ka mga paa. Nakapanglad-ok si Norman.

“Bwinggiton man ta’g dili oras niini, Nim! Yuna pa, lima ka syakoy gihapon ang imong paliton...?”

“Oo, lima gihapon, Norm! Timan-i nga alang kanako, Norms, way gipinig ang gugma, kinsa ug unsa siya. Ang importante kanako nga mahigugma ko sa usa ka lalake...!”

“Pagkapalaran sa lalake nga makaangkon sa imong gugma, Nim...!”

“Palaran ka, Norms! Tindero’g syakoy man tuod ka, apan sa dugay na natong panagsuki, inlab ko nimo, Norms....!” ni Nimfa nga midip-ig paglingkod kang Norman sa sopa ug migakos sa tindero’g syakoy nunot sa pagdumol sa mga ngabil niini aron hagkan ni Norman niadtong orasa. (Kataposan)