Ang guod Lalawigan sa Sugbo

Ang guod maoy matang sa bulos sa kawayan nga hilabihan ka lig-on, sigo ug solido. Pinutlan ug salin kini sa gibatas nga mga bulos sa kawayan nga inanay’ng mitubo ug maoy sagad nga himuong haligi sa pagahimuong balay, payag ug koral, tungod sa gihuptan niining kalig-on.

Gulang na ang guod, apan kasaligan ang nahuptang kalig-on ug kasolido niini, nga andam molahutay ug mosungasong sa bisan unsang pagsulay sa panahon, ilabi na gayud nga dulot sa kalamidad sa kinaiyahan.

Sa kinabuhi sa tawo, mahimong ikapanag-ing usab ang guod sa kinaiya ug lahutay nga nahuptan sa usa ka tawo, nunot sa pagdailos sa katuigan. Dili ikalimod nga adunay mga tawo nga naghupot usab sa talagsaong kalig-on sa kaugalingon, bisan pa man kun hataas na ang ilang pangedaron. Adunay gulang o tigulang na, apan hilabihan pa kalig-on ang pamayhon ug lutahan ug naghupot gihapon og talagsaong abilidad sa kinabuhi nga dili mayano ug maasi-asi sa kabatan-onan karon.

Oo, adunay mga tawo, nga sa atong panan-aw ug karkulo, huyang ug dili gayud kasaligan. Ubos na kaayo ang atong pagtan-aw niadtong mga edaran ug tigulang na, kay maoy atong pagtuo nga huyang na gayud ang ilang mga tuhod ug nagapaingon na sa ilang katigulangon.

Apan usahay, daw dili kita makatuo, nga mas lig-on ug mas kusgan pa sila, ikumparar sa mga batan-on diha sa natad sa paugnat sa kusog ug sa ubang abilidad nga halayo da kaayo ang kabatan-onan karon. Nahisama sila sa mga guod, nga bisan gulang ug edaran na, bisan matawag na  og tigulang, apan misamot ang kalig-on ug kasigo niini nga milahutay sa pagpuyo sulod sa daghang katuigan.

Busa, angay natong awaton ug saludohan ang nahuptang kinaiya sa usa ka guod. Magpakaguod ta. Imatuod ta, nga samtang magakadugay ang atong pagpuyo ibabaw ning kalibutan, mag-anam usab og kalig-on ang atong prinsipyo ug baruganan mosamot kalig-on ug kasolido ang atong tagsatagsa ka kaugalingon!

Sama sa usa ka guod, mobarog ta nga molahutay ug dili matarog sa bisan unsang makusog nga bagyo nga mohuyop ug mokusokuso sa atong kinabuhi. Ug kini nuntan nato sa tumang pailob, uban ang hugot nato nga pagsalig, pagtuo ug pag-ila sa atong Ginoo nga maoy atong Diyos, Hari ug Manluluwas diha sa atong kinabuhi.

Aber, sulayan ato.