Wala’y sukod ang bawos

Daling miambak si Renato gikan sa PUJ nga iyang gisakyan sa dihang miliko na unta kini paingon sa dalang Manalili, wala lang gani siya mohatag sa iyang plite.

Samtang naglakaw, nagpunay usab og liraw ang iyang mga mata. Gani magpanglingi siya usahay. Nanagana man lang gud siya basin og dunay nakakita sa iyang gibuhat ug basin og gisundan siya.

Hinuon, nagtuo gayud siya nga wala gayu’y nakamatikod sa iyang gibuhat. Bisan gani kadtong hamtong nga lalake nga maoy iyang gikuotan. Kay nagpunay man lang gihapon kini’g sultihanay ug kadtong tawo nga didto maglingkod sa ilang atbang sa dayon na niya’g ambak sa PUJ.

Sa dihang nakakita na og usa ka kan-anan si Renato, midali siya og sulod. Apan ang pagsulod niya dili kay aron mokaon, apan ang pagsulod sa pansayan sa maong kan-anan. Mao man guy tuyo niya ang pagsusi gayud sa sulod sa pitaka nga iyang nakuot.

Ug kalit lang nga nahasiga ang mga mata ni Renato, sa dihang nakita niya ang daghan kaayong kuwarta diha sa sulod sa pitaka. Pulospulos ra ba gayud taglibuhon ug duna pa gani mga dolyar.

Daling gikuha ni Renato ang ubang mga sulod sa maong pitaka ug gibutang kini niya sa sulod sa basurahan. Kuwarta ra gayud maoy iyang gibilin diha sa pitaka. Dayon iyang gisulod ang maong pitaka  sa bulsa sa iyang karsones diha sa likurang bahin niini.

Gikan sa maong kan-anan, misakay dayon og taxi  si Renato. Ug nagpahatod siya sa usa ka dapit sa dakbayan, diin mahimutang ang usa ka sikat kaayo nga kan-anan. Nakahunahuna man gud siya sa pagkaon ug mga lamian og mga mahalon kaayong pagkaon. Total sa hunahuna pa niya daghan man kaayo siya’g kuwarta. Ug maayo sab og mosuway-suway siya sa kinan-an sa mga kuwartahan.

Sa pag-abot gyud ni Renato sa usa ka sikat kaayong kan-anan, mideretso dayon siya’g sulod. Wala gayud siya magpanuko kay tarong man sab ang biste nga iyang gisul-ob. Batasan man gud nilang mga mangunguot nga mamiste gayud og maarang-arang nga sinina. Aron mokumpiyansa kanila ang ilang biktimahon. Ug dili sab dayon sila masuspetsahan, ilabi nag manulod sila og dagkong mga establisamento.

Sa pagdinali ni Renato og sulod, kadaghan hinuon siya makabangga og mga tawo. Ilabi na niadtong taligawas na sa maong kan-anan. Apan wala lang kini baleha niya. Ug mipadayon siya.

Mi-order dayon si Renato og mga nagkalainlaing pagkaon. Wala na lang gani siya’y pupangutana sa presyo niini. Nagsalig man gud siya sa kadaghan niya’g kuwarta niadtong tungora. Dako man gud ang kantidad sa kuwartang iyang nakuot.

Pagkahuman ni Renato og kaon, gihinol dayon niya ang bulsa sa iyang likod. Aron kaha unta pagkuha og kuwarta diha sa pitaka, nga iyang kinuot.

Apan kalit lang siyang gikulbaan, kay wala naman diha sa iyang bulsa ang maong pitaka. Gidali dayon niya’g susi ang ilawom nga bahin sa lamesa nga iyang gikan-an. Basin na lang og nahulog kini. Apan wala gayud siya’y pitakang nakita.

Nahinumdom dayon si Renato sa dayon na niya og sud sa kan-anan. Daghan ra ba kaayo siya’g gikabangga. Nagduda na hinuon siya nga gikuot gayud ang maong pitaka. Naproblema na hinuon siya   kun asa siya’g kuwarta nga ibayad sa iyang gikaon. (Kataposan)