Ang silingan

Hoy! Ayaw ko’g nganli’g buang, ha! Tingali’g buk-on ko nang imong nawong,” matud sa bana ngadto sa asawa. “Sige no! Sulayi og buak, buanga ka, tan-awon nato kun kinsang nawong ang mabuak,” tagawtaw sa asawa.

Ingon niini kanunay ang madungog sa mga silingan kun mag-away na ang maong magtiayon. Walay trabaho kun Sabado ug Domingo ang bana busa buntag pa, magsugod na kini’g inom og bino. Igong maudto-udto, magsugod na og yawyaw ang asawa hangtod mag-away na sila.

“Hoy! Unsa may imong gidugayan, diha hala pahawa,” dayon kung tambo sa bintaha aron tan-awon kun kinsay iyang gipapahawa.

“Dia may mopalit nako og taho, Noy,” tubag sa magtataho nga maoy gipapahawa.

“Sige, pahawa diha kay tingali’g labayon tika niining botelya sa mallorca.”

Walay nahimo ang pobreng magtataho kundili, gialsa ang iyang tinda ug milakaw. Ingon niana ang maong silingan nga mangasaba lang sa mga pobreng bendor nga ang bugtong sala mao ang pag-agi sa ilang tugkaran. Ang asawa ug inahan sa lalaki maoy promotor sa sugalan nga kun adlawan pa, anha una sa sulod sa balay apan inigka-hapon, adto na sa gawas daplin sa kalsada. Ilang ipagawas ang lamesa ug mga lingkoranan ug anha sa daplin sa kalye magsugal.

Sama lang kini sa kalingawan o dula sa mga silingan. Kun medyo dimalason ang asawa sa sugal nianang gabhiona, buntag pang sayo magtagawtaw na.

Usahay manglupad ang mga plato nga adto mangabuak sa kalye kun ipanglabay sa bana labi na kun maka-inom na kini. Naka-ingon ako nga may tawo gyud diay nga walay kaulaw sa iyang isig-kaingon bisan sa kabulgar sa ilang kinaiya.

Ang bana kun mahubog na, bisan anaa lang sulod sa ilang balay, magsinggitsinggit sama sa nangita og away. Hapit tanang adlaw na lang madungog ang kusog nga mga tingog sa magtiayon kun kini mag-away na.

Apan usa ka buntag niana, “Nganong gipang-karga man nang ilang mga gamit” akong gipangutana ang akong asawa.

“Giimbargo man kono na kay nanga-prinda na man diay na hasta ang ilang balay maong papahawaon na sila sa ilang giprindahan.”

Sa dihang milarga na ang trak nga gikargahan sa ilang mga gamit, diha pa ako mahibalo nga wala na diay ang magtiayon kay nianang gabii pa nanglakaw biniyaan ang ilang balay ug mga gamit.

Bisan nakapahiyom ako sa kalipay nga wala na ang mga sabaan, apan naluoy usab ako sa ilang sunod nga mahimong silingan. (Kataposan)