Gugmang matuod

Gula 4

Pwerte nga nakapakpak sa mga tawo dihang misugod na si Raffy sa pagkanta sa Please Love Me Now nga gipasikat kaniadto ni Eddie Peregrina.

Halos pulos nagngisi ang panagway sa mga tawo nga nagtutok ni Raffy samtang misundog sa tingog ni Eddie. Nakabantay si Raffy nga adunay babaye nga nagpahiyom nga nagsud-ong kaniya samtang siya nag-awit.

Makabungog nga pakpak ang nadawat ni Raffy human g'yud niya’g kanta. Gisugat dayon siya nila ni nang Ason, Lester ug Isko dihang nanaug na si Raffy gikan sa mubo nga bantawan.

“Kanindot diay nimo mokanta dong Raffy,” matud ni nang Ason. “Sigurado na bai nga ikaw ang modaug,” giingnan ni Lester ang iyang higala.

Unya wala magdahum si Raffy nga kadtong babaye nga nagpahiyom nga nagsud-ong kaniya samtang nag-awit miduol og apil sa mitunol sa iyang pagdayeg.

“Congrats, sundog g'yud nimo ang tingog ni Eddie Peregrina. Kanunay ko makadungog sa maong kanta kay kantahon ni sa akong Papa kaniadto,” matud sa babaye.

“Mao ni siya si Melody dong Raffy, ako ni nga pag-umangkon," matud ni nang Ason. Taud-taud gipahibalo na ang mga mananaug. Wala gayud masayop si Lester, si Raffy ang nakakuha sa first prize.

Dihang gidawat na ni Lester ang P500 nga premyo nga gihatag sa barangay kapitan, wala siya magdahum nga mi-request si Melody nga pakantahon siya pag-usab sa “Don't Ever Go” ni Eddie gihapon.

Wala makabalibad si Raffy. Human sa iyang pagkanta, nagpasalamat kaniya si Melody.

“Naa diay ka sa ila ni Tiya Ason? Maayo unta kun magdugay ka pa dinhi sa amo para makatambong ka sa among fiesta,” ni Melody pa.

Nahinangop si Raffy kay bisan og bag-o pa siya sa maong dapit apan nakakita na siya og mga higala. Gisugdan ang sunod nga kontis nga mao ang sayaw.

Daw nanginit na ang kalawasan ni Raffy. "Melody, makamao ka ba nga mosayaw kay gusto unta ko nga moapil ta sa kontis," maguwang sa hagawhaw ang tingog ni Raffy ngadto sa dalaga.

"Sige, unsa nga tukarang atong sayawan?" ni Melody pa nga nagpahiyom nga miatubang kang Raffy. “Kadto lang kinaraan nga tukar, Night Fever,” matud ni Raffy.

Nagsabot sila si Raffy ug Melody kun unsa ang ilang mga stepping sa pagsayaw. Human nila og sabut, nagkataw-anay sila nga daw dugay na kaayo nga nagkasuod.

Miabot ang higayon nga ila nang turno ang pagsayaw. Bisan kadtong mga tawo nga kaganina didto ra sa unahan nagbarug, mipaduol aron sa pagtan-aw sa sayaw nila ni Raffy ug Melody. (Sumpayan)