Sa buntag nga giduol ko'g mangingilad

Samtang nagkaon ko’g kapayas nga pinutos og plastik unaha’g diyotay sa Sto. Rosario Church, human sa buntagong misa nga gitambongan ko, miduol ang usa ka batan-ong babaye ug nangutana: “Sir, Sir, asa man ni sakyon ang para Sulpicio Lines?”

Gitutokan ko ang babaye. Duna koy gisusi sa iyang panagway. Milihay iyang panan-aw. Apan mipadayon: “Asa man, Sir? Tudloi ko, bi!”

Dili man ni maong dalana ang gibarogan mo, Miss. Walay dyip moagi dinhi padung sa Sulpicio Lines. Kun gusto ka, adto atang sa may dalan Colon. Daghang PUJ didto nga moagi’g piyer. Pilia lang ang mga Urgello nga dyip kay moagi na tanan.” Tudlo-sugyot ko sa putiong dalagita.

“Hala, uy, wa man ko makatultol ana. Mahimo bang imong kong ubanan?” paraygon kaayo iyang tingog-matang sa hangyo nga makapatando. Apan nagpabilin kong gahi. Ngano? Tungod kay ang maong mga pulong, pamilyar na kaayo sa akong pangdungog. Daw karaan kining bagting sa lingganay nga yabag na kaayong paminawon. Ug pila na ba ka inosente ang nangailad human madala sa maong mga pagpakaaron-ingnon?

“Aw, wa ka katultol, Miss? Sayon ra na. Pakuyog lag pulis aron makatultol ka!” Pintok kong tubag nga milantaw sa unahan. Ubos sa landong sa traffic light, dinhay nagbarog nga traffic enforcer. Nakahunahuna ko nga dad-on ang babaye ngadto sa parak. Dinha man goy pagduda nga natawo sa akong kahiladman. Gigunitan ko ang bukton niya aron mangadto mi. Apan naunsa ba, nga milabnot man siya ug midagan palayo. Wa gyoy lingilingi.

Taudtaod, may karaang forwarder nga miagi sa akong tungod. Dunay tulo ka lalaking sakay nga pulos bagsik ang nawong. Usa kanila mikawaykaway sa kamot, ingon sa naay gisenyasan. Unya tayming nga mipula ang traffic light, nahasiga akong mata pagkakita ko sa batan-ong babaye nga dali nilang gipasakay.

Nasigpatan sila sa pulis. Gipitohan sila. Apan berde na ang suga ug hawan pa gyod ang dalan. Nakahigayon pagpasirit sa pagpadagan ang drayber. Gigukod sila sa pulis. Motorsiklo batok forwarder. Naglinutosay sa sayong kabuntagon. Unya, aduna koy namatikdan. Morag migaan ang bolsa sa akong likod. Gikuot ko kini. Hastang demalasa. Ang pitaka ko, wala na! (Kataposan)