Gula 2
Gisaysayan si Raffy ni nang Ason nga kinahanglan unta niya ang kwarta kay lisud kaayo ang kahimtang nila sa bukid.
Sa hilom gibati ni Raffy ang kaluoy sa sitwasyon ni nang Ason. “Pwede ba og mouban ko nimo og kanaug nang Ason? Adto usa ko sa imong balay moestar kay wala g’yud ko’y kaabtan,” ni Raffy pa nga nagpakiluoy.
“Hala, pobre ra ba g’yud tawon mi dong. Si manong Isko nimo nga akong bana, panguma ra g’yud intawon ang panginabuhi,” matud ni nang Ason. “Ayaw kabalaka nang, dia ko’y gamay’ng kuwarta nga ikapalit og atong makaon.”
Tuod, miuban si Raffy pagkanaug ni nang Ason. Nahibulong ang konduktor nga nakakita nga nanaug si Raffy. “Sa Samboan ka man kaha bai?”
“Walay problema , sigi lang,” dali nga tubag ni Raffy. Ngitngit ang palibot kay walay suga ang ilang gikanaugan. Gikuot ni Raffy ang iyang dala nga flashlight gikan sa bag nga diha sa iyang buko-buko.
Mipahiyom si nang Ason. “Maayo kay nagdala ka diay og ika-iwag dong.” Gisubay nila kadtong gamay’ng dalan-dalan. Paniid ni Raffy, kapin sa oras na sila nga naglakaw tungas ug lugsong sa mga bungtod.
“Kun wala ka pa’y dala nga espat dong dili g’yud ta makalakaw og paspas,” matud ni nang Ason. Sa unahan, may nalantawan si Raffy nga mora’g kabalayan. “Duol na ta dong,” gilingi ni nang Ason si Raffy.
Tuod, miabut gayud sila sa balay ni nang Ason. “Uy, kinsa ba kanang imong kauban Ason?” matud sa lalaki nga miabli sa pultahan.
“Si Raffy man kuno ang iyang ngalan. Anhi usa kuno siya moestar sa ato Isko mentras wala pa siya’y kapuy-an,” gipasabut ni nang Ason ang iyang bana.
Nasayran ni Raffy nga may anak-lalaki diay si nang Ason. “Mas maayo tingali Isko nga ubanan nimo kini si Raffy didto sa kapilya kay may kalingawan man human sa pangadye,” matud ni nang Ason.
Nangaon usa sila. Sa unang higayon, natilawan ni Raffy ang kapait sa bukid kay buwad ra ang ilang gisud-an. Human nila’g pangaon, nanglakaw sila si Raffy ug ang bana ni nang Ason paingon sa kapilya.
Sa pikas bungtod mahimutang ang kapilya. Daghan diay’ng balay nga nahimutang kilid niini ug human na ang pangadye sa ilang pag-abut.
“Malingaw ka dinhi dong. Dunay kontis sa sayaw ug kanta,” giingnan ni Isko si Raffy. Dayon may miduol kanila. “Uy, mao ni ang akong anak dong Raffy, si Lester. Si Raffy ni siya Lester, kauban ni Mama nimo gikan sa syudad.” (Sumpayan)