Subay sa matarong nga dalan

Lulan sa usa ka tricycle, ang magtiayon nga Nestor ug Nerissa padulong sa ilang pinuy-anan sa Tabok, Mandaue City. Gikan ang magtiayon sa usa ka bible reading session sa balay sa ilang tinamod kaayo nga si Pastor Toriano, kinsa talilarga sa gawas sa nasud. Didto usab ang ilang mga higala nga mga lay ministers sila si Joel, Aying ug Brod Nanding, ang best friend ni Nestor nga usa ka real estate broker.

Malipayon kaayo si Nerissa sa dakung kausaban nga nahitabo sa iyang bana nga si Nestor. Kaniadto maayo kaayong pagkagumon niini sa bisyo. Inom, babaye ug sugal labi na gayud sa sabong. Gidungog ra gayud sa kahitas-an ang iyang pag-ampo. Miapil ra gayud sa ilang religious group si Nestor. Mga dul-an na sa tuig nga naobserbahan ni Nerissa nga sayo na kaayo kini mouli gikan sa opisina niini sa Metro Sun Arrastre Service sa may port area, diin nag-alagad kini isip usa ka supervisor.

Dili sama kaniadto nga bisan asa nga beerhouse kini masangit, unya hubog na kaayo nga mouli.

Kapila ba kahigayon nga iya kining masakpan kaniadto lainlain lang nga mga babaye ang mao-text niini naa sila si Alma, Chanda, Trixia ug kinsa pa kadto? Karon mo-intrega na kini sa sakto nga suweldo. Ang nakaayo pa nadani kini ni Brod Nanding nga mag-part time isip usa ka real estate agent. Gani sa niaging tuig nakahalin na man kini og duha ka lote.

Ang commission dako kaayo nga natabang sa tuition sa duha nila ka anak nga pulos na mga college. Pipila lang kini sa mga grasya nga niabot sa magtiayon sukad sa dakong transformation ni Nestor.

Usa ka higayon niana sa balay ni Brod Nanding, kauban si Pastor Toriano ... “Tabangi diay ko ninyo Brod Nestor ug Brod Nanding nga mahalin ang akong house and lot, ako nalang kining ibaligya og mga two million. Kahibalo bitaw mo nga talilarga na ang akong tibuok pamilya sa gawas,” matud ni Pastor Toriano.”

Wala’y problema pastor,” hapit magkadungan pagtubag si Nestor ug si Brod Nanding.

Wala madugay, gumikan sa kadaghan og mga contact nila ni Nestor ug Nanding nakakita dayon ang managkumpare og buyer. Si Mr. Bob Isidruz, usa ka lending investor. Paghilabay sa duha ka bulan nakalarga na sa gawas ang tibuok pamilya ni Pastor Toriano. Nagtuo ang managhigala nga wala siguro madayon og kahalin ang property sa pastor kay wala naman kini mo-contact nila. Apan usa niana ka adlaw sa may mall, nasugatan nila ni Nestor ug Brod Nanding si Mr. Bob Isidruz.

“Ako na nga nabayran ang property ni Pastor Toriano, wala diay mo makadawat sa inyong commission?” matud ni Mr. Isidruz. “Iyang gikuha ang lugar sa inyong commission kay siya na lang kuno ang mohatag niini nganha ninyo.” Nahilaw ang dagway sa duha ka managhigala sa ilang nadungog. Daw dili sila makatuo nga mabuhat sa ilang giila ug tinamod nga pastor ang pagsibat sa ilang commission.

Sukad niadto wala na mag-apil-apil sa ilang mga bible reading session si Nestor. Dako kaayo ang iyang kahiubos sa ilang pastor. Ang gibuhat sa pastor sukwahi kaayo sa mga gipamulong niini sa panahon sa ilang mga prayer meeting. Taphaw diay kaayo ang pagkatawo niini, pareho sa uban nilang mga kauban nga nag-apil-apil lang sa grupo aron makigsosyalan. Na’ay uban nilang mga kauban nga magsige lang og pa libre sa plete sa tricycle. Ang uban motunga lang sa ilang session kun dunay kaon, ilabi na kun dunay miyembro nga mag-birthday. Dad-on pa gani ang mga anak. Usa ka Domingo niana, nakahukom si Nestor nga mosuroy sa bulangan. Taudtaod na kining wala makasaksi, maingon man makapamusta og sabong. Wala siya mokuyog sa iyang asawa nga si Nerissa sa pagsimba nga may oras pa man unta. Samtang lulan sa tricycle padulong sa bulangan, misanting na usab sa alimpatakan ni Nestor ang gibuhat sa ilang pastor, apan sunod nga mipasundayag sa iyang hunahuna mao ang gisulti ni Nerissa. “Ayaw pagpatental Nestor, usa lang kini ka matang sa pagsuway sa imong pagtuo, padayon sa paghugot sa imong pagtuo sa Diyos. Kalit si Nestor nga napugwat sa iyang lawom nga pagpamalandong dihang ... “Boss nia na ta tungod sa bulangan. Puwede ka nang manaug sa tricycle,” matud sa tricycle driver.

“Dili ta dinhi sa bulangan,” matud ni Nestor. “Diretso ta, diretso ta sa simbahan.” (Katapusan)