Siyudad sa Sugbo

Human ikaparking ang awtong Honda Civic sa daplin sa sementadong dalan kilid sa Plasa Independencia, puno sa pagmahal nga giagbayan ni Boy si Ipen, dihang nanganaog na sila sa gisakyang awto. Didto sila mopaingon sa sementadong lingkuranan nga nagliyok sa dakong punoan sa kahoy. Madasigon silang nanglingkod.

“Nausab na gayud ang tibuok Plasa Independencia, Pen!” gitutokan ni Boy ang asawa nga mapahiyumon. “Matahom na kaayo ang palibot...!”

“Bitaw, Boy! Lab-as pa kaayo sa akong panumdoman sa dihang mga teenager pa ta nga nagkahinigugmaay ug kanunay tang mag-deyt dinhi sa Plasa Independencia...!”

“Labong pa kaayo sa mga bombil ug kasagbutan ang atubangan ug luyong bahin sa Fort San Pedro niadto, Pen...!” nagyangungo si Boy. “White rabbit nga kendi lang ang atong bawon...!”

“Ug cotton candy lang ang sagad tang mapalit kay parehas man tang apiki ang kuwarta, Boy...!”

“Bitaw. Tam-is kaayo ang cotton candy, Pen! Sama katam-is sa batan-on tang gugma kaniadto ug hangtod karon...!”

“Kataw-anan kaayo, Boy! May higayon nga makatuhil ta’g hugaw sa tawo ilawom sa gilingkuran tang punoan sa bombil...!”

“Gihimo tang inspirasyon ang atong gugma, Pen, aron maningkamot nga kahatagan og katumanan ang atong mga damgo...!”

“Bitaw, Boy! Bisan parehas lang tang mga anak sa mga ginikanang basurero ug basurera, apan atong gimatuod nga ang kakabos, dili babag aron pagkab-ot og hataas nga edukasyon...!”

“Oo, Pen! Nag-working scholar tang duha sa usa ka unibersidad dinhi sa siyudad. Kaluoy sa Diyos, dungan tang miggradwar sa kursong Accountancy ug dungan pa gyud nga nipasar sa board exam aron mahimo tang mga CPA...!”

“Ug nahimo tang mga manager karon sa tagsatagsa ka pribadong banko nga atong gialagaran sa siyudad, Boy...!”

“Pulos na usab mga propesyonal ang atong tulo ka mga anak nga ulitawo ug dalaga, Pen. Gituyo ko nga manuroy ta karong hapona dinhi sa Plasa Independencia, aron lab-ason ang atong kagahapon, Pen...!”

“He-he-he! Basin aduna gihapoy manuroy og cotton candy, Boy...!”

“Basin bitaw, Pen! Gihidlaw na kong motilaw og cotton candy, isip tipik sa atong teenager romance kanhi...!”

Giagbayan gihapon ni Boy si Ipen dihang nanggawas na sila sa Plasa Independencia. Mipadulong sila sa giparkingan sa ilang awtong Honda Civic.

“Kleng! Tilinggg! Klennn...! Tilinnng...!”

Maoy nalantawan nila ni Boy ug Ipen ang usa ka tindero og cotton candy nga padayong nagdusoduso sa kahon niyang tindahan ug nagsige og tiling-tiling sa unahan.

“Cotton candy...!” nagdungan og singgit sila si Boy ug Ipen nunot ang sagunson nga pagkamay sa tindero og cotton candy, samtang nag-ira’g ang magtiayon sa dulong sa ilang Honda Civic nga awto. (Kataposan)