Guwapa nga Tindera

Gula 6

Gikuninitan sa grupo ang init pa nga litson nga gi-order ni Max. Nalingaw kaayo sila nga nagtinabangay sa pagpaksi sa kagumkom kaayong panit sa litson.

Bisan bag-o pa si Max nga nakauban sa mga classmates ni Katrina apan daw suod na kaayo siya kanila. “Maayo gani Kat kay gidala nimo si sir Max kay kun wala pa, makaluluoy unta ta kay wala ta’y mga hustong budget,” matud sa usa sa grupo.

“Botar g’yud mi ni sir Max nga siya ang imong boyfriend,” ni Liezel pa nga laing classmate ni Katrina. Igo ra nga mipahiyom si Katrina apan si Max daw mahilis kay siya ang napuntariya sa panan-aw sa grupo.

Human sa ilang pagpangaon, nakahukom ang magbarkada nga mamahuway makadiyot. Nagkasabot sila nga mag-abot pagbalik sa baybayon pagkataud-taud aron adto magpalabay sa oras.

Nag-iya-iya ang mga classmates ni Katrina sa pag-adto sa masi’g nila ka cottage assignment. Nahabilin sila si Max ug Katrina. “Adto na mo sa inyong cottage para makapahuway mo ug makabalik dayon mo sa baybayon,” matud ni Liezel.

Tuod misulod na sila si Max ug Katrina sa cottage. “Dako kaayo ang akong pagpasalamat nimo Max kay gitabangan mi nimo sa among kalihukan. Pasensya na kay wala’y budget ang mga estudyante,” matud ni Katrina.

Giagbayan ni Max si Katrina. Ang dalaga wala na magpanagana sa pagbai-id kang Max. Kalit lang nga nanginit ang kalawasan ni Max dihang nagkabag-id ang ilang lawas.

Gigakos ni Max si Katrina ug gihagkan. Lahi sa una nila nga pagparayganay, mas bongga na karon si Katrina kay misukol na kini kaniya sa pagpakigparayganay.

Nagkainit ug nagkainit ang ilang pagparayganay. Nahilom ang tibook cottage. Nagpungasi ang mga hawok ni Max sa batan-ong dalaga.

Sanglit wala man mapawong ang suga sa ilang lawak, tataw nga nakita ni Max nga gipiyong ni Katrina ang iyang mga mata samtang padayon niya kining giparaygan.

Misamot kahilom ang lawak sa cottage. Pareho nga pinugngan ang ilang pagginhawa.

“Kat, katrina, I love you so much,” nakatuaw si Max tungod sa grabeng kalalim nga iyang gibati. “I love you too Max. Ayaw gub-a ang akong kaugmaon, isalig nako nimo ang akong kaugmaon Max,” ni Katrina pa.(Sumpayan)