Langgam sa Kagabhion

Gula 14

Nihunong na pagpangutana ang bata. Wala na magkutikuti pa.

Usa ka adlaw niana, gisibya sa mga radyo ug telebisyon ug napatik usab sa mga pamantalaan nga dunay daghang nahilo sa bulanghoy sa usa ka lugar. Napatik ang maong balita sa Banat News nga maoy paborito kong basahon. Mao usab kini ang pamantalaan nga kinaham sa mga kauban kong tindera.

Sumala sa balita sa Banat News, giawhag sa mga awtoridad ang mga tawo nga likayan una ang pagkaon sa mga pagkaon nga hinimo sa balanghoy. Naapektohan gyud ang akong paninda kay mao man kini ang halin kaayo sa akong isuroy sa kadalanan.

Nabalaka na ko pag-ayo. Duha na ka semana nga menos kaayo ang halin sa gibaligya nakong mga paninda sa among dapit. Kanunay dili mahurot ang akong gitinda. Diyotay ra kaayo ang mga tawo nga namalit kay nahadlok na silang mahilo sa mga paninda nga gisuroy.

Tungod sa maong isyu, ang akong ginansiya sa pagpaninda igo ra gyud nga ikapalit og bugas alang sa pagkaon namo sa akong duha ka anak. Gibati ko’g dakong kaluoy sa akong mga anak. Busa nagplano ko nga mangita og laing paninda nga dili pagkaon.

Usa ka adlaw niana, mipalit sa akong gibaligya nga suman balanghoy ang usa ka babaye, si Eva. Kining babayhana naila sa among dapit nga babayeng mubo og lupad o burikat. Nagpakabuhi siya pinaagi sa pagbaligya sa iyang unod. “Di diay ka mahadlok mokaon og suman balanghoy?” giingnan nako si Eva.

“Gihidlaw na ko ani, uy,” niya pa. “Dugay na kong wala makakaon og suman balanghoy. Ug wala man seguro’y magluto ug tuyoon pagbutang ug hilo o kaha dili seguradohon nga limpiyo.

Wala ko makatingog. -- Sumpayan pa