Guwapa nga Tindera

Gula 4

Daw gisalig na lang ni Nang Belen si Katrina ngadto kang Max kay giisip na niya nga suod na kaayo ang ulitawo kanilang magtiayon.

"Gitug-anan na kami ni Katrina dong nga nagkarelasyon na kamo, itugyan namo kanimo ang iyang kaugmaon. Ayaw tawon siya binuangi kay buotan kaayo kanang among anak," matud sa inahan ni Katrina.

Gipasaligan ni Max si Nang Belen nga bantayan niya si Katrina samtang tua sila sa Bohol. Duha sila ka adlaw didto sa yuta sa mga Bol-anon mao nga nangandam gayud si Max alang sa ilang biyahe. Naandan na gayud nga kuhaon ni Max si Katrina gikan sa tunghaan human sa iyang klase. Mihapit usa sila sa Mambaling ug nagpalit og litson aron magdungan ra sila'g panihapon didto sa balay nila ni Katrina.

"Kaikog na gayud namo nimo Max kay kanunay ka na lang nga mogasto para dinhi sa balay," matud ni Berto nga amahan ni Katrina. "Mao bitaw nga giisip ka na lang 'sab namo nga anak Dong." Human nila'g panihapon, nagsultihanay sila si Katrina ug Max sa balkon sa balay. "Dili ka ba mauwaw sa akong mga classmate nga dili pa man nimo sila suod? Mag-sinardinas lang ta'g katulog ra ba sa cottage," giingnan ni Katrina si Max.

Milingi-lingi si Max aron pagsiguro kun wala bay laing tawo nga makadungog sa iyang isulti ni Katrina. "Gusto nako nga maglain ta og cottage, unya motampo ko og duha ka litson para sa grupo," matud ni Max. Daw natuk-an si Katrina pagkadungog nga maglain sila og cottage si Max gikan sa iyang mga classmate. "Mahadlok ka ba diay nako Kat? Gisalig ka na bitaw nako sa imong mga ginikanan," dugang pasabot ni Max sa dalaga.

"Hinoon malipay g'yud ang akong mga barkada nga mohatag ka og duha ka litson para sa grupo apan basin og ila ko nga bugal-bugalan kun mouban ko nimo pagkatulog sa cottage," pasabot ni Katrina kang Max.

Gihapuhap ni Max ang buko-buko ni Katrina aron paghumpay sa kabalaka sa dalaga.

"Ibaliwala na kana nila kun makakita nga suod kaayo ta'ng duha. Total, anha man gayud padulong kay graduating ka gud, inigkahuman nimo sa pag-eskwela mahimong pakasal dayon ta," ni Max pa.

Wala na motingog ang dalaga nga nagpasabot nga miuyon na siya nga mag-ipon sila sa usa ka cottage inig-adto nila sa Bohol.

Tuod, miabot gayud ang adlaw nga migikan na sila paingon sa Bohol. (Sumpayan)