Dear Tita Salie,
Hello, I hope you are in good health karon ug sa tanang panahon. Just call me Ms. C. I am here in Mandaue City, but actually dili gyod ko taga diri. Nakapuyo lang ko aning lugara tungod kay naa ko diri nag-eskuyla ug tungod usab sa financial and family problem.
Third year college na ko karon, Tita, ug gusto unta ko mo-stop pag-eskuyla kay ganahan ko molarga paingon sa Manila. Gusto ko mangita og trabaho didto aron usab makatabang tabang ko sa akong parents nga pobre gyod kaayo. Dili nako kaya maghunahuna nga wala ko’y gibuhat karon aron pagtabang sa akong mga ginikanan. Kay nasayod ko nga lisod kaayo ang ilang kahimtang labi na karon nga mahal na kaayo ang mga palitunon.
Apan ang akong problema, Tita, kay dili man mosugot akong parents nga moundang ko pag-eskuyla kay sayang kuno nga one year na lang ug mo-graduate na ko. Pero gusto gyod nako nga motabang nila, Tita, ug mobalik lang ko pag-eskuyla puhon kun makatigom na ko og kwarta.
Gusto man gyod nako nga makahuman sa akong pagtuon. Busa mobalik pa gyod ko, pero karon gusto una ko motrabaho aron kun duna na ko’y sweldo matabangan na nako ang akong mama ug papa.
Unsa may maayo nakong buhaton, Tita? Palihog pasabta ko. Daghang salamat sa imong pagtagad. God bless.
* * *
Hello Miss C,
Sa atong panahon karon nga lisod kaayo mas maayo gyod kun duna kay pangandoy ug diskarte aron imong makab-ot ang imong gustong maabot sa kinabuhi. Mas nakaayo gyod ang imong gibuhat nga nangita ka og paagi aron maka-eskuyla kun wala’y ika-afford ang imong mga ginikanan. Ayaw wad-a nang imong paglaom kay ang kawad-on dili babag aron ka magmalampuson. Dili sama sa uban nga tungod kay wala’y kwarta si mama ug papa mawagtang usab ang ilang paglaom nga maka-eskuyla. Busa pasalamati kanunay ang Diyos kay gitagaan ka og paagi ug ang mga tawo nga mitabang kanimo karon.
Nakasabot ko sa anaa sa imong hunahuna nga gusto gyod nimo nga matabangan ang imong mga ginikanan, pero dili pa karon ang hustong panahon. Mas maayo gyud nga imong tiwason una ang imong pag-eskuyla kay 1 year na man lang ang kulang. Kun moundang ka karon ug mobalik sa sunod nga tuig maglisod kana tungod kay imo na man lang unyang makalimtan ang inyong gitun-an.
Kun manarbaho ka karon dili ka pa makasulod ug makakuha og dako nga sweldo tungod kay dili ka pa man gradwado. Ug lisod pa gyod nimo ang pagpangita tungod kay tag-as nga qualification ang gipangita.
-- Tita Salie