Langgam sa Kagabhion

Gula 10

Ako pang makit-an nga iyang palitan og lamian nga pagkaon ang iyang manok ug pinainom pa kini og vitamins. Samtang ang among anak dili niya mapalitan og bag-ong sinina o bisan Tiki-tiki man aron dunay vitamins ang bata.

Maghuot na kanunay ang akong dughan samtang magsud-ong ko sa among kahimtang. Sama ako sa usa ka bata nga giilogan og duwaan. Nga sa una wala’y kabutangan sa kalipay samtang ako pa ang gipangga ni Lando, apan karon giilog na siya kanako ug giilisan sa iyang hiniktan.

Tungod niini permi na lang ko nga maghilak ug usahay, makit-an ko sa akong anak. Ug nasayod ko nga naguol siya.

Hingpit na gayod nga nausab ang kinaiya ni Lando. Nahanaw na kadtong kabuotan ug kamapinanggaon nga akong nasinati sa iyang mga kamot kaniadto. Milampos gayod ang among mga silingan nga balhiboon og dila sa paghilo sa kaisipan sa akong bana nga maoy nakapausab sa iyang batasan.

Nahimong iresponsable nga bana ug amahan si Lando. Kanunay kining molakaw aron mamaligya busa makasapi kini sa matag adlaw. Ang problema kay dili na kini mointrigo kanako sa iyang kinitaan. Ihurot niya’g gasto sa inom ug sugal ang iyang kuwarta uban ang iyang mga barkada.

Maayo na lang gani kay wala gayod ako pasagdi sa akong mga ginikanan. Sila’y maghatod kanunay og bugas para sa among kunsomo. Ang mga ginikanan usab ni Lando ang miabaga sa among sud-an ug ubang panginahanglan. Wala usab sila makauyon sa gipakita nga taras sa ilang anak. Ug gisaway nila ang dakong kausaban sa kinaiya niini. -- Sumpayan pa