Pula nga nagsiga

Tawga kono si Shirley ug pangutan-a kun unsa ning nagsiga nga pula tungod sa speedometer sa sakyanan. Layo na ra ba ta’g napanaw ining sakyanana. Unya wa ta kahihawo kun unsay nadaut ini. Kay nahinumdom ko’s atong sakyanan nga may mosiga man kun may problema. Sama sa kulang ang asyete sa makina” ni Paul ngadto sa iyang kapikas nga si Ursula nga nagsakay tupad niya sa front seat.

“Wa lagi nay kaso!” ni Ursula nga nagsige’g pindot sa selpon kay dunay giteksan. “Moingon kalang ana kay di man ikaw drayber. Pero ako, mahadlok ko kay hi-tech naman god kaayo ang mga sakyanan karon. Halos di man gani madungog ang andar ini. Masayod lang tang namatay ang makina kay dunay laing mosiga. Taas na ra ba ta’g napanaw. Kun dunay nadaut ini, modako ang damage nga sige ta’g padagan nga may daut” ni Paul. Nagpanagana sa iyang pagpadagan sa sakyanan.

Kasamtangang nagsubay sila sa V. Rama Ave., karong buntaga padulong sa Calamba diin nahimutang ang opisina ni Paul isip CPA. Nagpuyo sila sa Gabucan Compound sa Guadalajara. Gipahulam sila’g sakyanan ni Shirley nga usa ka Interior Designer, kay kasamtangang gipatalyer ang Isuzu Crosswind ni Paul. Tungod sa kadaghan na’g damage (ang bumper kataktakon na) namugos si Ursula nga ipaayo na ang sakyanan kay pinangga kaayo ni Shirley iyang mga ginikanan, di siya gustong magkalisodlisod sila sa ilang pagbiyahe-biyahe. Gipahuwaman niya iyang brand new nga Hyundai Getz nga itom. Siya lang ang mihagad nga mag-commute ngadto sa iyang opisina sa JY Square sa Lahug.

Unang higayon pa gyud ron ang pagdrayeb ni Paul sa sakyanan sa anak. Unom na ka bulan ang nilabay sa pagpalit ining sakyanan, nisuway lang siya’g padagan atras-abante. Kadiyot kaayo. Apan wa gyud siya nipadagan og layo. Nabag-ohan siya’s paniil sa maong kotse. Kay ang Isuzu, Diesel ang makina, dakong pagkalahi sa paniil sa digasolina nga makina. Lawom pa gyud og clutch ang Hyundai Getz. Tulo ka tuig na ang Isuzu nga gidrayban ni Paul. Ang iyang mga tiil gianad anad niya sa kotse. Katulo siya mamatyig makina sa dalan. Wa pa maanad sa tayming.

Sa hinayhinay padagan ni Paul nakaabot ra gyud sila sa iyang opisina. Partner-in-crime ning managtiayon. Kay sa hayskul pa, uyab na sila. Unya sa kolehiyo, pareho sila’g kurso. Accountancy. Nagdungan sila’g kuhag board exams. Nagsabot nga kun makapasar sila’g sa dili, kinahanglan magpakasal na gyud sila. Kay nagsabak na si Ursula. Maayo gani kay nakapasar si Paul. Nag-abli dayon sila’g Accounting Firm sa Calamba. Unya si Ursula ang nahimong personal secretary ni Paul. Duha ra ilang anak. Si Fiona ang kinamaguwangan. Nakahuman og BS Psychology, HRD Manager siya karon sa Tonolan Dev. Corp. usa ka dakong land developer.

“Ingna si Shirley nga di na ko modrayeb sa Hyundai karong hapon inig pauli nato. Paari-a siya aron siya’y modrayeb ug mang-hits lang ta pauli. Kay mismo sa pagpaandar sa aircon, di ko kahibawo’g unsay pindoton. Hasta sa radyo o stereo, di ta kamao mopatingog,” ni Paul sa pagsaka nila sa opisina, human naparking ang kotse.

“Nagteks man si Shirley nako. Nga wa ra nay delikadong nagsiga nga pula” ni Ursula, nanarapo sa iyang lamesa.

“Di gani nako matan-aw kun hain ang gauge sa temperature sa makina” dugang ni Paul.

Tuod man, pagka-alas singko sa hapon, nihapit si Shirley sa opisina sa amahan. Siya na ang nimaneho sa kotse. Pag-arangkada niini, wa nay nagsiga nga pula tungod sa speedometer.

“O tan-awa, di ba wa na man tong nagsiga ganihang buntag kadtong ako ang nagdrayeb”: ni Paul nga mao nay naglingkod sa front seat tupad sa nagdrayeb. Si Ursula tua na’s luyo naglingkod. Ug sige lang gihapo’g pangteks. Kun naa siya’s opisina, maghapon mag-atubang sa computer, sige’g panan-aw og Facebook sa mga higala. Kun naa’s kotse, sige’g pang-teks. Apan si Paul, may selpon. pero wa gyud nakat-on og teks. Kay niya pa, dugang sa trabahong wa kinahanglana. “Pagdrayeb nimo ganiha, Pa, gigamit nimo ang seat belt? O wa?’ ni Shirley samtang nagmaneho padulong sa Guadalajara.

“Wa. Wa man gyud ko maanad anang seat belt” ni Paul.

“Ah mao tong nagsiga nga pula. Nagpahinumdum nimo kanunay nga wa ka nag-seat belt” ni Shirley.

Nagkinataw-anay silang tulo. Ug nahuwasan si Paul sa kabalakang may daut ang kotse. (Katapusan)