Katam-is handumon

Gula 7

Gikulbaan kaayo si Siegfred kay tingali’g estrikto ang amahan ni Sally ug kasab-an siya nga nakigsuod sa iyang anak.

Taud-taud nga wala mahibalik sa iyang nahimutangan didto sa beranda si Sally. Apan paglabay sa 15 minutos, mibalik na si Sally. “Paadtoon ka ni Daddy ug Mommy sa sala niining resthouse kay makighinabi sila kanimo,” giingnan ni Sally si Siegfred.

Misamot ang pagkuba-kuba sa iyang dughan apan wala siya’y mahimo kay mosamot kangil-ad kun dili niya atubangon ang mga ginikanan ni Sally. Kalma nga milakaw si Siegfred ug nakita niya ang amahan ni Sally nga naglingkod sa sala apan nagtalikod.

“Maayong gabii ninyo sir, maam,” daw nagkurog ang tingog ni Siegfred sa iyang pagpangatahuran. Milingi ang Daddy ngadto ni Siegfred. “Fred? Ikaw man lagi kini? Ikaw diay ang gikaila sa akong anak?” nakurat ang Daddy ni Sally, ingon man si Siegfred nga wala makatingog dayon.

“Sir? … imo diay’ng anak si Sally? Wala g’yud ko magdahum Sir, ssssori kaayo Sir,” ni Siegfred pa nga klaro na nga nagkurog. “No, nganong mangayo ka man og pasaylo? Tinuod g’yud diay nga buotan ka kay ikaw man diay kuno ang nakakita sa pitaka ni Sally nga nahulog sa pagpangaligo nila’s dagat.”

Wala gayud magdahum si Siegfred nga si Sally nga karon nahimo na niyang girlfriend, anak diay sa manager sa gitrabahoan niya nga auto repair shop. Miduko si Siegfred sa ka-uwaw.

“Buyno, swerte ka Sally nga nahigala nimo kini si Siegfred kay usa siya sa buotan ko nga kawani sa shop. Siya maoy usa sa banggiitan ko nga mekaniko. Mora’g tukma kaayo Fred kay mo-resign na ang akong chief mechanic kay mo-abroad, ikaw ang itudlo ko nga chief mechanic sa shop kay ako ka nga masaligan,” matud sa Daddy ni Sally.

Nahinangop kaayo ang amahan ni Sally. “Mag-inom ta’g gamay aron pagpainit sa atong lawas isip selebrasyon sa imong promosyon Fred. Moinom ka ba Fred?” matud sa Daddy sa dalaga.”Gamay lang Sir, dili kaayo moinom og daghan.”

Diha si Sally molingkod tupad ni Fred samtang sila nag-inom ug ang iyang Daddy. “Dy, akong giingnan si Fred nga dili ka mamili kun kinsa ang akong mabana basta buotan lang, dili ba Daddy?” 

Dali kaayo nga nakamatikod ang amahan ni Sally nga may buot ipasabot ang iyang anak. “Kay ngano, nagkarelasyon ba dayon mong duha? Kun mao kana, wala ko’y pagsupak sa inyong relasyon ug malipay ko kun kamo ang magkadayon,” matud sa Daddy ni Sally.

Gigakus ni Sally si Siegfred bisan diha sila atubangan sa iyang Daddy. “I love you Fred.” Nauwaw kaayo si Fred apan mibawos siya sa paggakus sa dalaga.(Kataposan)