Duwende ang higala ni Bantoy

Magtutungha si Bantoy sa elementarya sa ilang dapit ug ang iyang panuigon, hapit na moabot sa 12 ka tuig. Hilomon siya nga pagka bata butang nga gidayeg siya sa iyang mga magtutudlo.

Daghan ang natingala kaniya kun nganong magsulti siya nga nag-inusara. Usa gani kadto ka hapon didto siya sa eskuwelahan, nakighinabi siya sa iyang higala.

“Asay maayo kun magpakita ka sa akong mga higalang taga kalibotan, matud ni Bantoy. “Kuan man god, nagtuo sila nga nabuang ako kay magsulti akong usa ra.”

“Apan, dili mahimo, Bay, kay gidili kana sa akong mga ginikanan. Masuko ang among kaliwat kun makigsulti ako sa dili namo gusto,” pulong sa higala ni Bantoy.

“Mas maayo tingali nga magpalayo kita dinhi ning dapita. Ayaw kabalaka kay lingawon nato ang imong mga higala.”

Og sa usa lang ka pagkuot sa bulsa, gipakita kang Bantoy ang daghang candy para ihatag ni Bantoy sa iyang mga higala sa eskuwelahan. Natingala ang mga higala ni Bantoy kun diin gikan ang mga candy?

“Ayaw na lang kamo’g pangutana pa. Kaon kamo sa candy kay gikan kana kanako.”

Milakaw si Bantoy kauban sa usa ka tawo nga dili makita. Nagtinan-away ang mga higala ni Bantoy ug natingala sila kun diin gikan ang mga candy. Hinuon, ang mga candy sama ra sa candy nga atong makita diha sa mga tindahan.

Dinhi maglibog ang mga ginikanan ni Bantoy kinsa man gayod kining higala ni Bantoy. Ang amahan ni Bantoy, dili gayod motuo nga naa kining duwende dinhi sa kalibotan. Kun naa man sila, dili sila manghilabot sa mga tawong taga kalibotan. Alang kaniya, kining mga duwende bunga lang kini sa makuting isip sa mga magsusulat.

Karon si Bantoy, hapit nang mograduwar sa elementarya ug matud pa niya kanunay gihapon siyang duawon sa iyang higala ug matud pa sa iyang higala, duna kunoy surpresa nga ihatag kaniya sa iyang higala kun makatapos na siya sa iyang pagtuon sa elementarya.

Kun ang iyang mga ginikanan maghisgot kaniya mahitungod sa iyang higala nga duwende, igo lang mopahiyom si Bantoy. Naay mga panahon nga dili magpakita kaniya ang higala, bation siya’g kamingaw.

Hinuon, daan nang nagsulti ang iyang higala nga moabot ang panahon nga dili na sila magkita kun did-an na kini sa iyang mga ginikanan didto sa ilang kalibotan. Naay mga panahon nga bation og kasubo si Bantoy kun moabot kana nga panahon. (Kataposan)