Katam-is handumon

Gula 6

Wala damha nila ni Sally ug Siegfred nga mubo ra kaayo ang panahon aron magkatagbo ang masi’g nila ka pagbati. Nagkasabot ang ilang mga kasing-kasing nga wala na kinahanglana pa ang pagpangamural ni Siegfred kaniya. “Fred basin og makaingon ka nga yano na lang g’yud kaayo ko nga pagka babaye kay nakigparayganay nimo nga bisan wala ka manguyab nako,” may kabalaka ang tuno sa sinultian ni Sally samtang misandig sa dughan sa ulitawo.

“Wala kana sa akong huna-huna Sal. Gani nalipay kaayo ko nga nagkasabot sa hilom ang atong mga kasing-kasing. Isaad ko kanimo nga ikaw na gayud maoy akong panggaon og mahalon,” matud ni Siegfred. Migakus si Sally kaniya.

Apan may daklit nga kabalaka nga mihakup sa kaisipan ni Siegfred. Kalit nga mipasunding sa iyang kaisipan ang managlahi nila nga kahimtang. Diha sa iyang huna-huna nga masuko gayud ang mga ginikanan ni Sally kun masayod nga nakigrelasyon kini og sama kaniya nga pobre.

“Abi nimo Fred, buotan kaayo sila si Daddy ug Mommy. Ila ko nga gisultihan nga dili sila mamili kun kinsa ang akong mabana basta buotan lang,” matud ni Sally nga daw naghatag og gamay’ng kadasig sa dughan ni Siegfred.

Subli sila nga nagparayganay. Tam-is kaayo puy-an ang kalibutan alang kanilang duha kay daw ang ilang nahimutangan usa ka paraiso. Wala na gani sila makabantay nga ang ilang mga tiil, gitilap-tilapan na sa mga bawod kay paspas ang pagtaub sa dagat.

“Mamauli na ta sa resthouse Fred kay karong taud-taud basin og mangabot na kadto sila si Daddy gikan sa siyudad,” matud ni Sally. May giandam na nga pagkaon ang katabang nila ni Sally sa pag-abot nila ni Siegfred.

“Mag-una na lang ta’g kaon Fred kay gigutom na ko,” giingnan ni Sally si Siegfred. Human sila makakaon, didto sila manglingkod sa beranda sa resthouse nga nag-umbaw sa dagat. Matag karon og unya magparayganay gayud sila si Sally ug Fred.

“Malipayon kaayo ko karong adlawa Fred,” ni Sally pa. “Ingon man usab ako Sal, apan gikulbaan ko kay basin masuko ang imong Daddy nga dia ako dinhi uban nimo,” matud ni Siegfred nga mabalak-on kaayo.

Subli nga gipasabot ni Sally si Fred nga buotan ang iyang amahan. Taud-taud, may nalantawan sila nga sakyanan nga nagsingabut sa ilang nahimutangan. “Sila na kana si Daddy ug Mommy, Fred. Dinhi ka lang kay ako silang sugaton,” matud ni Sally.

Misugod na pagkuba-kuba ang dughan sa ulitawo. (Sumpayan)