Langgam sa Kagabhion

 Gula 6

Naluoy ko ni Lando kay halos iyang gipataypatay ang iyang lawas sa trabaho aron lang gyud duna siya’y kuwarta nga madala sa among panimalay. Gusto unta ko nga motabang sa akong bana sa pagpangita og kuwarta apan unsaon ko man nga wala man koy nahuman nga kurso.

Ako usab ang nag-atiman sa among anak busa kinahanglan gyud ko nga magpuyo sa balay. Igo na lang ako sa pag-asekaso kaniya sa panahon nga mopauli siya.

Bisan kun kapin na sa tuig sukad sa among pagminyo apan pareho kaming duha nga hot lang gihapon sa lawasnong kalipay. Halos kada-gabii mo-score gyud si Lando kanako.

Tungod lagi kay nahigugma na ko pag-ayo kaniya, ganahan ra pud ko nga hilabtan kanunay ni Lando. Sa dili pa siya molakaw aron isuroy ang inangkat niyang balot tagbawon ko niya pag-una, ug bisan sayo kaayo siyang molakaw sa kaadlawon aron maghatod og newspaper sa iyang mga suki, iya gyud kong pukawon sa iyang mga halok ug gakos.

Hangtod nga dihang nag-edad na’g dos anyos ang kamagulangan namong anak nga si Princess nagsabak ako si ikaduha namong liwat.

Dinhi nagsugod og lubad ang kinaiya ni Lando. Mituo man gud siya sa tsismis sa among mga silingan nga mga balhiboon og dila nga dili siya ang amahan sa bata nga akong gisabak.

May nagpalakaw og estorya nga si Elly amo ra usab nga silingan, ang amahan sa akong gimabdos. -- Sumpayan pa