Dear Tita Salie,
Have a wonderful day. I am an avid reader of your column, and I really enjoy reading your advice, Tita. Gusto usab ako nga magpatabang kanimo niining akong problema karon.
My problem is about my current situation. Duna ko’y anak apan wala pa mi makasal sa amahan sa akong anak. Dili pa gyod ko minyo, pero duna ko’y partner nga wala usab karon dinhi sa Pilipinas tungod kay tua man sa Saudi ang iyang trabaho.
Mahal kaayo nako ang amahan sa akong anak apan wala nako kapugngi ang akong kaugalingon ug naanod ko sa bul-og sa tentasyon. Nakasala ko sa akong partner kay dunay nahitabo namo sa iyang magulang nga lalaki. Katulo na kahigayon nga among gitagbaw ang among kaugalingon sa lawasnon nga kalipay. Matud sa igsoon sa akong partner nga mahal ko niya apan nasayod ko nga dili husto ang among gibuhat, Tita. Ug karon mora og nagkaanam ra ba og ka-develop ang akong feelings ngadto kaniya. Apan hapit na usab mouli ang iyang manghod nga maoy amahan sa akong anak.
Gusto nako mamatay ang akong feelings sa magulang sa akong partner apan wala ko masayod kun unsaon, Tita. Palihog tabangi ug pasabta ko. Thank you very much and more power.
-- Liezel of Labangon
* * *
Dear Liezel.
Kasagaran gyod kining mahitabo sa magtiayon nga layo sa usa’g-usa. Matental pa man gani ang uban bisan ang ilang partner anaa lang uban nila, unsa pa kaha ang layo sa hinigugma.
Mas maayo og dako na kanang butang nga naka-realize ka nga dili gyod maayo ang imong gibuhat. Samtang wala pa mabisto ang imong gibuhat hunonga gyod kana kay dili maayong hulaton pa nimo nga masayran sa uban ug sa imong partner ang nahitabo kaninyo.
Panalipdi ug ampingi pag-ayo nga dili maguba ang imong pagkatawo. Hinay-hinaya pagputol ang imong feelings ngadto sa magulang sa imong partner aron dili mahibaw-an nga inyo siyang gitraydor. Ayaw paanod sa imong gibati, labina ang mga tentasyon nga moabot sa imong kinabuhi. Ug maoy paningkamoti nga mabungahon ang inyong pagbati og makabaton kamo og usa ka respetadong pamilya.
Huwata na lang ang pag-abot sa imong partner ug ayaw na hunahunaa ang iyang magulang. Kun wala dinhi sa Pilipinas ang imong partner pangita og kalingawan aron mabisi ang imong kaugalingon. Puyde ka magnegosyo o kaha magtukod og tindahan aron duna kay bantayan ug dili na nimo mahunahuna ang imong lawasnong panginahanglan.
-- Tita Salie