“Wow!” tuaw ni Lando human sa among kombate.
“Naunsa ka?” matud ko nga naghayang nga wala pa makasul-ob og sinina.
“Wa gyud diay ko masayop sa akong pagtuo,” matud ni Lando. “Ako gyud ang nakauna nimo.”
“Suwerte kaayo ka,” nako pa. “Bisan wa tikaw higugmaa pero ikaw gyud ang nakapusgay sa kaputli sa akong pagka babaye.”
Nahitutok si Lando kanako.
Human sa pilit kaayong pagtutok ni Lando kanako, miingon siya.
“Way bale nga wa ko nimo higugmaa,” niya pa. “Ang importante mao nga ako ka nang asawa. Ug dili na gyud kini malalis pa tungod kay kasado na ta.”
Wala ko motingog. Pero sa hilom nakasabot ko sa iyang gibati. Mi-adjust siya sa akong kinaiya. Nakadayeg ko sa iyang kamasinaboton.
Ang nahitabo sa unang gabii sa among kasal nasubli sa makadaghan. Tungod sa kabuotan ug kamasinaboton ni Lando, inanay nga nahulog ang akong pagbati ngadto kaniya. Hangtod nga nahigugma na gayod ako kaniya.
Malipayon na kami kanunay sanglit pareho na man kaming nahigugma sa usa’g-usa. Puno kanunay sa gugma ang matag anib sa pagtagay namo sa lawasnong kalipay. Natagbaw ko sa among seksuwal nga gimbuhaton.
Hangtod nga nagsabak ko. Dihang nahimugso na ang unang bunga sa among gugma, nga usa ka babaye, gidoble na ang paningkamot ni Lando. Mamaligya siya’g newspaper sa adlaw, balot na usab ang iyang ibaligya sa gabii. -- Sumpayan pa